ਕੋਝੀਕੋਡ, 7 ਅਕਤੂਬਰ (ਪੋਸਟ ਬਿਊਰੋ)- ਕੇਰਲ ਦੇ ਕੋਝੀਕੋਡ ਜ਼ਿਲੇ ਵਿੱਚ ਪਰੁਲਸ ਨੇ ਇੱਕੋ ਪਰਵਾਰ ਦੇ ਛੇ ਮੈਂਬਰਾਂ ਦਾ ਸਿਲਸਿਲੇਵਾਰ ਕਤਲ ਕਰਨ ਦੇ ਇੱਕ ਸਨਸਨੀਖੇਜ਼ ਕੇਸ ਦਾ ਖੁਲਾਸਾ ਕੀਤਾ ਅਤੇ ਤਿੰਨ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਪੁਲਸ ਮੁਤਾਬਕ 13 ਸਾਲ ਦੇ ਵਕਫੇ ਦੌਰਾਨ ਮੁੱਖ ਦੋਸ਼ੀ ਔਰਤ ਜੌਲੀ ਅੰਮਾ ਨੇ ਸਾਇਨਾਈਡ ਦੇ ਕੇ ਆਪਣੇ ਹੀ ਟੱਬਰ ਦੇ ਛੇ ਮੈਂਬਰਾਂ ਦਾ ਕਤਲ ਕਰ ਦਿੱਤਾ ਸੀ। 
ਇਸ ਸੰਬੰਧ ਵਿੱਚ ਪੁਲਸ ਨੇ ਦੱਸਿਆ ਕਿ ਜੌਲੀ ਨੇ ਆਪਣਾ ਜੁਰਮ ਮੰਨ ਲਿਆ ਹੈ। ਉਸ ਨੂੰ ਹਾਲੇ ਸਿਰਫ ਜੌਲੀ ਦੇ ਪਤੀ ਰਾਏ ਟਾਮਸ ਦੇ ਕਤਲ ਦੇ ਦੋਸ਼ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਸ ਇਨ੍ਹਾਂ ਸਾਰੇ ਛੇ ਕਤਲਾਂ ਦੇ ਕੇਸਾਂ ਵਿੱਚ ਜੌਲੀ ਦੇ ਖਿਲਾਫ ਸਬੂਤ ਇਕੱਠੇ ਕਰਨ ਵਿੱਚ ਲੱਗੀ ਹੋਈ ਹੈ। ਜੌਲੀ ਤੋਂ ਇਲਾਵਾ ਗ੍ਰਿਫਤਾਰ ਕੀਤੇ ਗਏ ਛੇ ਹੋਰ ਮੁਲਜ਼ਮਾਂ ਐਮ ਐਸ ਮੈਥਿਊ ਅਤੇ ਪ੍ਰਾਜੀ ਕੁਮਾਰ 'ਤੇ ਜੌਲੀ ਨੂੰ ਸਾਇਨਾਈਡ ਸਪਲਾਈ ਕਰਨ ਦਾ ਦੋਸ਼ ਹੈ। ਇਸ ਦੌਰਾਨ ਰਾਏ ਦੀ ਮਾਂ ਦੀ ਮੌਤ ਸਾਲ 2002 ਵਿੱਚ, ਪਿਤਾ ਟੌਮ ਟਾਮਸ ਦੀ ਮੌਤ 2008 ਵਿੱਚ, ਚਾਚੇ ਮੈਥਿਊ ਦੀ ਮੌਤ ਸਾਲ 2014 ਵਿੱਚ ਅਤੇ ਚਚੇਰੇ ਭਰਾ ਸ਼ਾਜੂ ਦੀ ਪਤਨੀ ਸਿਲੀ ਦੀ ਮੌਤ 2016 ਵਿੱਚ ਅਤੇ ਉਨ੍ਹਾਂ ਦੀ ਭਤੀਜੀ ਅਲਫਾਇਨ ਦੀ 2011 ਵਿੱਚ ਮੌਤ ਹੋਈ ਸੀ। 14 ਸਾਲਾਂ ਦੀ ਮਿਆਦ ਵਿੱਚ ਹੋਈਆਂ ਇਨ੍ਹਾਂ ਛੇ ਮੌਤਾਂ ਨੂੰ ਲੋਕ ਕੁਦਰਤੀ ਮੌਤਾਂ ਮੰਨਦੇ ਰਹੇ। ਅਜਿਹੇ ਵਿੱਚ ਪੁਲਸ ਦੇ ਖੁਲਾਸੇ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਰਾਏ ਦੇ ਰਿਸ਼ਤੇਦਾਰ ਵੀ ਕੁਦਰਤੀ ਮੌਤ ਮੰਨਦੇ ਰਹੇ, ਪਰ ਉਨ੍ਹਾਂ ਨੂੰ ਸ਼ੱਕ ਉਦੋਂ ਹੋਇਆ ਜਦੋਂ ਰਾਏ ਦੀ ਮੌਤ ਪਿੱਛੋਂ ਜੌਲੀ ਉਸ ਦੀ ਜਾਇਦਾਦ 'ਤੇ ਕਬਜ਼ਾ ਕਰਨ ਦੀ ਕੋਸ਼ਿਸ਼ ਵਿੱਚ ਲੱਗ ਗਈ।