ਨਵੀਂ ਦਿੱਲੀ, 7 ਅਕਤੂਬਰ (ਪੋਸਟ ਬਿਊਰੋ)- ਦੇਸ਼ ਦੇ ਸਕੂਲਾਂ 'ਚ ਅਧਿਆਪਕਾਂ ਦੀ ਤਾਇਨਾਤੀ ਕਰਨ ਦੇ ਕੰਮ ਤੋਂ ਲੈ ਕੇ ਵਿਦਿਆਰਥੀਆਂ ਦੀ ਗਿਣਤੀ ਅਤੇ ਬੁਨਿਆਦੀ ਢਾਂਚੇ ਤੱਕ ਬਾਰੇ ਹੋ ਰਿਹਾ ਫਰਜ਼ੀਵਾੜਾ ਬੰਦ ਹੋਣ ਲੱਗਾ ਹੈ। ਸਕੂਲਾਂ ਨਾਲ ਜੁੜੀ ਅਜਿਹੀ ਹਰ ਜਾਣਕਾਰੀ ਆਨਲਾਈਨ ਹੋਵੇਗੀ। ਕਿਹੜਾ ਸਕੂਲ ਕਿੱਥੇ ਮੌਜੂਦ ਹੈਮ ਇਹ ਵੀ ਜੀਓ ਟੈਗਿੰਗ ਜ਼ਰੀਏ ਦੇਖਿਆ ਜਾ ਸਕੇਗਾ। ਇਸ ਉੱਤੇ ਕੰਮ ਸ਼ੁਰੂ ਹੋ ਗਿਆ ਹੈ ਤੇ ਅਗਲੇ ਛੇ ਮਹੀਨਿਆਂ ਅੰਦਰ ਇਹ ਸਭ ਕੁਝ ਆਨਲਾਈਨ ਹੋਵੇਗਾ। ਖਾਸ ਗੱਲ ਇਹ ਹੈ ਕਿ ਇਨ੍ਹਾਂ ਵਿੱਚ ਨਿੱਜੀ ਤੇ ਸਰਕਾਰੀ ਦੋਵੇਂ ਸਕੂਲ ਹੀ ਸ਼ਾਮਲ ਹੋਣਗੇ।
ਮਨੁੱੱਖੀ ਸਰੋਤ ਵਿਕਾਸ ਮੰਤਰਾਲੇ ਨੇ ਫਿਲਹਾਲ ਸਕੂਲਾਂ ਬਾਰੇ ਇਹ ਪੂੁੁਰੀ ਕਵਾਇਦ ਉਸ ਵੇਲੇ ਸ਼ੁਰੂ ਕੀਤੀ ਹੈ ਜਦੋਂ ਸਕੂਲਾਂ ਵੱਲੋਂ ਗਲਤ ਜਾਣਕਾਰੀ ਦੇ ਕੇ ਵਿੱਤੀ ਮਦਦ ਲੈਣ ਦੀਆਂ ਸ਼ਿਕਾਇਤਾਂ ਤੇਜ਼ ਹੋਈਆਂ ਹਨ। ਇਨ੍ਹਾਂ ਵਿੱਚ ਸਰਕਾਰੀ ਮਦਦ ਵਾਲੇ ਸਕੂਲ ਵੀ ਵੱਡੀ ਗਿਣਤੀ ਵਿੱਚ ਸ਼ਾਮਲ ਹਨ, ਪਰ ਇਨ੍ਹਾਂ ਦੀ ਗਿਣਤੀ ਕੁਲ ਸਕੁੂਲਾਂ ਦੀ ਗਿਣਤੀ ਦਾ ਸਿਰਫ ਪੰਜ ਫੀਸਦੀ ਹੈ। ਇਸ ਦੇ ਬਾਵਜੂਦ ਮੰਤਰਾਲੇ ਕੋਲ ਜੋ ਰਿਪੋਰਟ ਆਈ ਹੈ। ਉਸ ਮੁਕਾਬਕ ਇਨ੍ਹਾਂ ਸਕੂਲਾਂ ਕੋਲ ਨਾ ਤਾਂ ਬੁਨਿਆਦੀ ਢਾਂਚਾ ਹੈ ਅਤੇ ਨਾ ਲੋੜੀਦੇ ਅਧਿਆਪਕ ਹਨ। ਇਸ ਹਾਲਤ ਵਿੱਚ ਵੱਡੀ ਗਿਣਤੀ ਨਿੱਜੀ ਸਕੂਲ ਇੱਕ ਜਾਂ ਦੋ ਕਮਰਿਆਂ ਵਿੱਚੋਂ ਚਲਾਏ ਜਾ ਰਹੇ ਹਨ, ਓਥੇ ਸਰਕਾਰੀ ਸਕੂਲਾਂ ਬਾਰੇ ਵੀ ਸਰਕਾਰ ਦੀ ਸਥਿਤੀ ਖਰਾਬ ਹੈ ਕਿਉਂਕਿ ਦੇਸ਼ ਵਿੱਚ ਵੱਡੀ ਗਿਣਤੀ ਵਿੱਚ ਅਜਿਹੇ ਸਰਕਾਰੀ ਸਕੂਲ ਹਨ, ਜੋ ਇੱਕ ਜਾਂ ਜੋ ਅਧਿਆਪਕਾਂ ਦੇ ਭਰੋਸੇ ਚੱਲ ਰਹੇ ਹਨ। ਉਨ੍ਹਾਂ ਵਿੱਚ ਬੁਨਿਆਦੀ ਢਾਂਚੇ ਦੀ ਵੀ ਕਮੀ ਹੈ। ਇਹ ਸਥਿਤੀ ਉਦੋਂ ਹੈ ਜਦੋਂ ਕੌਮੀ ਪੱਧਰ 'ਤੇ ਅਧਿਆਪਕਾਂ ਤੇ ਵਿਦਿਆਰਥੀਆਂ ਵਿਚਾਲੇ ਅਨੁਪਾਤ ਕਾਫੀ ਬਿਹਤਰ ਹੈ। ਹਰੇਕ 23 ਤੋਂ 24 ਵਿਦਿਆਰਥੀਆਂ ਪਿੱਛੇ ਇੱਕ ਅਧਿਆਪਕ ਹੈ।
ਇਸ ਬਾਰੇ ਮਨੁੱਖੀ ਸਰੋਤ ਵਿਕਾਸ ਮੰਤਰਾਲੇ ਦੀ ਸਕੂਲੀ ਸਿੱਖਿਆ ਦੀ ਸੈਕਟਰੀ ਰੀਨੇ ਰੇਅ ਦੇ ਮੁਤਾਬਕ ਸਕੂਲਾਂ ਨਾਲ ਜੁੜੀਆਂ ਗੜਬੜਾਂ ਨੂੰ ਪੂਰੀ ਤਰ੍ਹਾਂ ਰੋਕਣ ਲਈ ਸਾਰੇ ਸਕੂਲਾਂ ਦਾ ਜੀ ਆਈ ਐਸ (ਜਿਓਗ੍ਰਾਫੀਕਲ ਇਨਫਰਮੇਸ਼ਨ ਸਿਸਟਮ) ਸਰਵੇ ਕਰਵਾ ਰਹੇ ਹਨ। ਇਸ ਹੇਠ ਹਰ ਸਕੂਲ ਦੀ (ਨਿੱਜੀ ਅਤੇ ਸਰਕਾਰੀ ਦੋਵਾਂ) ਦੀ ਜੀਓ ਟੈਰਿੰਗ ਹੋਵੇਗੀ ਜਿਸ ਨਾਲ ਸਕੂਲ ਨਾਲ ਜੁੜੀ ਹਰ ਜਾਣਕਾਰੀ ਦੇਖੀ ਜਾ ਸਕੇਗੀ। ਸਕੂਲਾਂ ਤੋਂ ਹੀ ਇਸ ਦੀ ਜਾਣਕਾਰੀ ਮੰਗੀ ਜਾ ਰਹੀ ਹੈ। ਬਾਅਦ ਵਿੱਚ ਇਸ ਦਾ ਥਰਡ ਪਾਰਟੀ ਵੈਰੀਫਿਕੇਸ਼ਨ ਵੀ ਹੋਵੇਗਾ। ਆਮ ਲੋਕਾਂ ਤੋਂ ਵੀ ਸੁਝਾਅ ਮੰਗੇ ਜਾਣਗੇ। ਜੇ ਕਿਤੇ ਕੋਈ ਗੜਬੜ ਜਾਂ ਗਲਤ ਜਾਣਕਾਰੀ ਦਿੱਤੀ ਗਈ ਹੈ ਤਾਂ ਸ਼ਿਕਾਇਤ 'ਤੇ ਇਸ ਦੀ ਜਾਂਚ ਹੋਵੇਗੀ।