* ਪ੍ਰਿੰਸ ਵੱਲੋਂ ਇਮਰਾਨ ਨੂੰ ਡਾਂਟਣ ਦੀ ਚਰਚਾ ਵੀ ਹੋਈ
ਇਸਲਾਮਾਬਾਦ, 7 ਅਕਤੂਬਰ (ਪੋਸਟ ਬਿਊਰੋ)- ਪਾਕਿਸਤਾਨ ਦੀ ਤੀਹ ਸਾਲ ਪੁਰਾਣੀ ਮੈਗਜ਼ੀਨ ‘ਦ ਫ੍ਰਾਈਡੇ ਟਾਈਮਜ਼' ਨੇ ਦਾਅਵਾ ਕੀਤਾ ਹੈ ਕਿ ਯੂ ਐਨ ਓ ਵਿੱਚ ਕੀਤੇ ਇਮਰਾਨ ਖਾਨ ਦੇ ਭਾਸ਼ਣ ਤੋਂ ਬਹੁਤ ਗੁੱਸੇ 'ਚ ਆਏ ਸਾਊਦੀ ਅਰਬ ਦੇ ਕਰਾਊਨ ਪ੍ਰਿੰਸ ਮੁਹੰਮਦ ਬਿਨ ਸਲਮਾਨ ਨੇ 27 ਸਤੰਬਰ ਨੂੰ ਆਪਣਾ ਉਹ ਜਹਾਜ਼ ਵਾਪਸ ਮੰਗ ਲਿਆ, ਜਿਸ 'ਚ ਇਮਰਾਨ ਖਾਨ ਨੂੰ ਖੁਦ ਹੀ ਅਮਰੀਕਾ ਭੇਜਿਆ ਸੀ ਤੇ ਉਸੇ ਉੱਤੇ ਪਾਕਿਸਤਾਨ ਵਾਪਸ ਆਉਣਾ ਸੀ। ਉਸ ਵਕਤ ਇਹ ਕਿਹਾ ਗਿਆ ਸੀ ਕਿ ਤਕਨੀਕੀ ਖ਼ਾਮੀਆਂ ਦੇ ਕਾਰਨ ਜਹਾਜ਼ ਨੂੰ ਵਾਪਸ ਮੁੜਨਾ ਪਿਆ ਸੀ, ਪਰ ਗੱਲ ਇਹ ਨਹੀਂ ਸੀ।
ਵਰਨਣ ਯੋਗ ਹੈ ਕਿ ਯੂ ਐਨ ਜਨਰਲ ਅਸੈਂਬਲੀ ਵਿੱੱਚ ਹਿੱਸਾ ਲੈਣ ਲਈ ਅਮਰੀਕਾ ਦੀ ਯਾਤਰਾ ਤੋਂ ਪਹਿਲਾਂ ਪਾਕਿ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਸਾਊਦੀ ਅਰਬ ਗਏ ਸਨ। ਇਥੋਂ ਉਹ ਕਾਰੋਬਾਰੀ ਫਲਾਈਟ ਉੱਤੇ ਨਿਊ ਯਾਰਕ ਜਾ ਰਹੇ ਸਨ, ਪਰ ਸਾਊਦੀ ਅਰਬ ਦੇ ਪ੍ਰਿੰਸ ਨੇ ਉਨ੍ਹਾਂ ਨੂੰ ਮਹਿਮਾਨ ਦੇ ਤੌਰ 'ਤੇ ਆਪਣਾ ਵਿਸ਼ੇਸ਼ ਜਹਾਜ਼ ਦੇ ਦਿੱਤਾ ਸੀ। ਇਮਰਾਨ ਖਾਨ ਉਸੇ ਜਹਾਜ਼ ਵਿੱਚ ਮੁੜ ਰਹੇ ਸਨ, ਪਰ ਇਸ ਨੂੰ ਅੱਧ ਰਸਤੇ 'ਚੋਂ ਵਾਪਸ ਜਾਣਾ ਪਿਆ ਸੀ, ਕਿਉਂਕਿ ਨਾਰਾਜ਼ ਹੋਏ ਸਾਊਦੀ ਅਰਬ ਦੇ ਪਿ੍ਰੰਸ ਨੇ ਆਪਣਾ ਜਹਾਜ਼ ਖੜੇ ਪੈਰ ਵਾਪਸ ਮੰਗ ਲਿਆ ਸੀ।
ਪਾਕਿਸਤਾਨ ਸਰਕਾਰ ਨੇ ਇਸ ਰਿਪੋਰਟ ਨੂੰ ਸਰਾਸਰ ਗਲਤ ਅਤੇ ਮਨਘੜਤ ਦੱਸਿਆ ਹੈ। ਫਰਾਈਡੇ ਟਾਈਮਜ਼ ਨੇ ਇਸ ਰਿਪੋਰਟ ਵਿੱਚ ਕਿਹਾ ਕਿ ਇਮਰਾਨ ਖਾਨ ਦੇ ਪ੍ਰਸ਼ੰਸਕਾਂ ਨੇ ਨਿਊ ਯਾਰਕ ਤੋਂ ਪਰਤਣ ਉਤੇ ਉਨ੍ਹਾਂ ਦਾ ਜੇਤੂ ਹੀਰੋ ਵਾਂਗ ਸਵਾਗਤ ਕੀਤਾ ਸੀ ਅਤੇ ਇਮਰਾਨ ਦੇ ਸਮਰਥਕਾਂ ਨੂੰ ਇਸ ਨਾਲ ਕੋਈ ਫਰਕ ਨਹੀਂ ਪੈਂਦਾ ਕਿ ਇਮਰਾਨ ਦੇ ਭਾਸ਼ਣ ਦੇ ਦੌਰਾਨ ਹਾਲ ਅੱਧਾ ਖਾਲੀ ਪਿਆ ਸੀ ਤੇ ਇਮਰਾਨ ਨੇ ਮੰਨਿਆ ਕਿ ਪਾਕਿਸਤਾਨ ਅਲ ਕਾਇਦਾ ਅੱਤਵਾਦੀਆਂ ਨੂੰ ਟਰੇਨਿੰਗ ਦਿੰਦਾ ਰਿਹਾ ਸੀ। ਫਰਾਈਡੇ ਟਾਈਮਜ਼ ਨੇ ਲਿਖਿਆ ਹੈ ਕਿ ਇਸ ਯਾਤਰਾ ਦੇ ਕੁਝ ਅਣਚਾਹੇ ਨਤੀਜੇ ਵੀ ਰਹੇ ਸਨ। ਪ੍ਰਿੰਸ ਨੂੰ ਪਾਕਿ ਦੇ ਈਰਾਨ ਨਾਲ ਸੰਬੰਧ ਮਜ਼ਬੂਤ ਕਰਨ 'ਤੇ ਵੀ ਇਤਰਾਜ਼ ਸੀ। ਇਸ ਮੈਗਜ਼ੀਨ ਨੇ ਇਹ ਦਾਅਵਾ ਕੀਤਾ ਹੈ ਕਿ ਸਾਊਦੀ ਅਰਬ ਦੇ ਪ੍ਰਿੰਸ ਇਸ ਗੱਲੋਂ ਵੱਧ ਨਾਰਾਜ਼ ਹੋਏ ਕਿ ਇਮਰਾਨ ਇਸਲਾਮਕ ਬਲਾਕ ਦੀ ਕਮਾਨ ਸੰਭਾਲਣ ਦੇ ਲਈ ਲੱਗੇ ਹੋਏ ਸਨ। ਉਨ੍ਹਾਂ ਨੂੰ ਇਸ ਨਾਲ ਕੋਈ ਫਰਕ ਨਹੀਂ ਪੈਂਦਾ ਕਿ ਭਾਰਤ-ਪਾਕਿ ਗੱਲਬਾਤ ਦੀ ਆਸ ਪਹਿਲਾਂ ਤੋਂ ਘੱਟ ਹੋ ਗਈ ਹੈ ਅਤੇ ਉਨ੍ਹਾਂ ਨੇ ਇੱਕ ਖੇਤਰੀ ਮੁੱਦਾ ਇਸਲਾਮੀ ਪਾਕਿਸਤਾਨ ਅਤੇ ਹਿੰਦੂ ਭਾਰਤ ਦਾ ਮੁੱਦਾ ਬਣਾ ਦਿੱਤਾ ਹੈ।