ਹੈਮਿਲਟਨ, 7 ਅਕਤੂਬਰ (ਪੋਸਟ ਬਿਊਰੋ) : ਸੋਮਵਾਰ ਦੁਪਹਿਰ ਨੂੰ ਹੈਮਿਲਟਨ ਦੇ ਹਾਈ ਸਕੂਲ ਦੇ ਬਾਹਰ ਹੋਏ ਹਮਲੇ ਵਿੱਚ ਇੱਕ 14 ਸਾਲਾ ਲੜਕੇ ਦੀ ਮੌਤ ਹੋ ਗਈ।
ਇਹ ਘਟਨਾ ਪਾਰਕਡੇਲ ਐਵਨਿਊ ਸਾਊਥ ਤੇ ਮੇਨ ਸਟਰੀਟ ਈਸਟ ਨੇੜੇ ਸਰ ਵਿੰਸਟਨ ਚਰਚਿਲ ਸੈਕੰਡਰੀ ਸਕੂਲ ਦੇ ਬਾਹਰ ਵਾਪਰੀ। ਪੁਲਿਸ ਨੇ ਦੱਸਿਆ ਕਿ ਜਿਸ ਸਮੇਂ ਹਮਲਾ ਹੋਇਆ ਤਾਂ ਲੜਕੇ ਦੀ ਮਾਂ ਵੀ ਮੌਕੇ ਉੱਤੇ ਮੌਜੂਦ ਸੀ। ਉਸ ਦੀ ਮਾਂ ਨੂੰ ਡੂੰਘਾ ਸਦਮਾ ਲੱਗਿਆ ਹੈ। ਪੈਰਾਮੈਡਿਕਸ ਅਨੁਸਾਰ ਲੜਕੇ ਨੂੰ ਜਾਨਲੇਵਾ ਸੱਟਾਂ ਲੱਗੀਆਂ ਸਨ ਤੇ ਉਸ ਨੂੰ ਇਲਾਜ ਲਈ ਸਥਾਨਕ ਹਸਪਤਾਲ ਲਿਜਾਇਆ ਗਿਆ। ਪੁਲਿਸ ਅਨੁਸਾਰ ਦੁਪਹਿਰ 3:40 ਵਜੇ ਦੇ ਨੇੜੇ ਤੇੜੇ ਜ਼ਖ਼ਮਾਂ ਦੀ ਤਾਬ ਨਾ ਸਹਾਰਦਿਆਂ ਹੋਇਆਂ ਲੜਕੇ ਨੇ ਦਮ ਤੋੜ ਦਿੱਤਾ।
ਪੁਲਿਸ ਵੱਲੋਂ ਇਹ ਪੁਸ਼ਟੀ ਕੀਤੀ ਗਈ ਹੈ ਕਿ ਮ੍ਰਿਤਕ ਸਰ ਵਿੰਸਟਨ ਚਰਚਿਲ ਸੈਕੰਡਰੀ ਸਕੂਲ ਦਾ ਵਿਦਿਆਰਥੀ ਸੀ। ਇਸ ਸਬੰਧ ਵਿੱਚ ਤਿੰਨ ਟੀਨੇਜ ਮਸ਼ਕੂਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਤੇ ਪੁਲਿਸ ਦੋ ਹੋਰ ਮਸ਼ਕੂਕਾਂ ਦੀ ਭਾਲ ਕਰ ਰਹੀ ਹੈ। ਪੁਲਿਸ ਵੱਲੋਂ ਜਾਰੀ ਕੀਤੀ ਗਈ ਪਹਿਲੀ ਮਸ਼ਕੂਕ ਦੀ ਪਛਾਣ ਅਨੁਸਾਰ ਉਹ ਸਿਆਹ ਨਸਲ ਦੀ, ਲੰਮੇਂ ਕਾਲੇ ਵਾਲਾਂ ਵਾਲੀ ਕੁੜੀ ਹੈ, ਜਿਸ ਨੇ ਕਾਲੇ ਰੰਗ ਦਾ ਕੋਟ, ਕਾਲੀ ਟੀ-ਸ਼ਰਟ-ਜਿਸ ਉੱਤੇ ਚਿੱਟੇ ਰੰਗ ਨਾਲ ਕੁੱਝ ਲਿਖਿਆ ਸੀ, ਕਾਲੇ ਰੰਗ ਦੇ ਚਿੱਟੇ ਤਸਮਿਆਂ ਵਾਲੇ ਜੁੱਤੇ ਪਾਏ ਹੋਏ ਸਨ।
ਪੁਲਿਸ ਨੇ ਦੱਸਿਆ ਕਿ ਦੂਜਾ ਮਸ਼ਕੂਕ ਗੋਰੇ ਰੰਗ ਦਾ ਟੀਨੇਜ ਲੜਕਾ ਹੈ ਜਿਸ ਨੇ ਚਿੱਟੇ ਰੰਗ ਦੇ ਜੁੱਤੇ, ਗੂੜ੍ਹੇ ਰੰਗ ਦੀ ਪੈਂਟ, ਗ੍ਰੇਅ ਰੰਗ ਦੀ ਲੰਮੀਆਂ ਬਾਹਾਂ ਵਾਲੀ ਸ਼ਰਟ ਤੇ ਕਾਲੇ ਰੰਗ ਦਾ ਬੈਕਪੈਕ ਪਾਇਆ ਹੋਇਆ ਸੀ। ਪੁਲਿਸ ਨੇ ਆਖਿਆ ਕਿ ਉਨ੍ਹਾਂ ਕੋਲ ਘਟਨਾ ਦੀ ਸਾਰੀ ਵੀਡੀਓ ਵੀ ਹੈ ਤੇ ਉਨ੍ਹਾਂ ਮਸ਼ਕੂਕਾਂ ਨੂੰ ਆਤਮ-ਸਮਰਪਣ ਕਰਨ ਲਈ ਵੀ ਆਖਿਆ ਹੈ। ਅਜੇ ਤੱਕ ਕੋਈ ਚਾਰਜਿਜ਼ ਨਹੀਂ ਲਾਏ ਗਏ ਹਨ। ਸੋਮਵਾਰ ਰਾਤ ਨੂੰ ਜਾਂਚਕਾਰਾਂ ਨੇ ਦੱਸਿਆ ਕਿ ਮ੍ਰਿਤਕ ਤੇ ਮਸ਼ਕੂਕਾਂ ਵਿੱਚ ਰਿਸ਼ਤਾ ਸੀ ਪਰ ਇਹ ਰਿਸ਼ਤਾ ਕਿਹੋ ਜਿਹਾ ਸੀ ਇਸ ਬਾਰੇ ਉਹ ਕੋਈ ਵੇਰਵਾ ਮੁਹੱਈਆ ਨਹੀਂ ਕਰਵਾ ਸਕੇ।
ਇਸ ਇਲਾਕੇ ਦੇ ਕਈ ਸਕੂਲਾਂ ਤੇ ਡੇਅਕੇਅਰਜ਼ ਨੂੰ ਥੋੜ੍ਹੀ ਦੇਰ ਲਈ ਹੋਲਡ ਤੇ ਸਕਿਓਰ ਆਰਡਰ ਤਹਿਤ ਰੱਖਿਆ ਗਿਆ ਹੈ ਕਿਉਂਕਿ ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਸਥਾਨਕ ਵਾਸੀਆਂ ਨੂੰ ਇਲਾਕੇ ਤੋਂ ਦੂਰ ਰਹਿਣ ਲਈ ਆਖਿਆ ਗਿਆ ਹੈ। ਜਾਂਚਕਾਰਾਂ ਦਾ ਕਹਿਣਾ ਹੈ ਕਿ ਉਹ ਇਸ ਇਲਾਕੇ ਵਿੱਚ ਅਜੇ ਵੀ ਸਬੂਤਾਂ ਦੀ ਭਾਲ ਕਰ ਰਹੇ ਹਨ। ਉਨ੍ਹਾਂ ਨੂੰ ਅਜਿਹੇ ਚਾਕੂ ਦੀ ਵੀ ਤਲਾਸ਼ ਹੈ ਜਿਹੜਾ ਇਸ ਘਟਨਾ ਵਿੱਚ ਵਰਤਿਆ ਗਿਆ ਹੋਵੇ। ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਘਟਨਾ ਵਾਲੀ ਥਾਂ ਦੇ ਨੇੜੇ ਇੱਕ ਪੈਪਰ ਸਪਰੇਅ ਕੈਨ ਮਿਲਿਆ ਹੈ। ਪੁਲਿਸ ਵੱਲੋਂ ਇਲਾਕਾ ਵਾਸੀਆਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਜੇ ਇਸ ਇਲਾਕੇ ਵਿੱਚ ਕੋਈ ਸਬੂਤ ਮਿਲਦਾ ਹੈ ਤਾਂ ਉਸ ਨੂੰ ਨਾ ਛੂਹਣ ਤੇ ਉਸੇ ਸਮੇਂ ਜਾਂਚਕਾਰਾਂ ਨੂੰ ਸੱਦਿਆ ਜਾਵੇ।