* ਕੋਰਟ ਤੋਂ ਕੈਦੀ ਭੱਜਾ ਦਿਖਾਉਣ ਵਾਲਾ ਸਿਪਾਹੀ ਡਿੱਸਮਿੱਸ
ਲੁਧਿਆਣਾ, 6 ਅਕਤੂਬਰ (ਪੋਸਟ ਬਿਊਰੋ)- ਇਸ ਮਹਾਨਗਰ ਦੀ ਕਚਹਿਰੀ ਵਿੱਚੋਂ ਸ਼ੁੱਕਰਵਾਰ ਫਰਾਰ ਹੋ ਗਏ ਵਿਚਾਰ ਅਧੀਨ ਕੈਦੀ ਦੇ ਬਾਰ ਇੱਕ ਵੱਡਾ ਖੁਲਾਸਾ ਹੋਇਆ ਹੈ। ਗੈਂਗਸਟਰ ਸੁੱਖਾ ਬਾੜੇਵਾਲੀਆ ਦਾ ਇਹ ਸਾਥੀ ਕੈਦੀ ਕਚਹਿਰੀ ਤੋਂ ਨਹੀਂ, ਆਪਣੇ ਘਰੋਂ ਫਰਾਰ ਹੋਇਆ ਸੀ, ਜਿੱਥੇ ਲਾਲਚ ਵਿੱਚ ਆ ਕੇ ਪੁਲਸ ਦਾ ਇੱਕ ਕਾਂਸਟੇਬਲ ਉਸ ਨੂੰ ਖੁਦ ਲੈ ਕੇ ਗਿਆ ਸੀ। ਫਿਰ ਉਹ ਕੈਦੀ ਮਹਿਲਾ ਤੇ ਤਿੰਨ ਸਾਥੀਆਂ ਸਮੇਤ ਪਟਿਆਲਾ ਪਹੁੰਚ ਗਿਆ। ਜਿੱਥੋਂ ਉਨ੍ਹਾਂ ਨੂੰ ਦਿੱਲੀ ਹੁੰਦੇ ਹੋਏ ਬਾਈ ਏਅਰ ਹੈਦਰਾਬਾਦ ਜਾਣਾ ਸੀ, ਪਰ ਸਮੇਂ 'ਤੇ ਪੁਲਸ ਨੇ ਰੇਡ ਕਰ ਕੇ ਚਾਰਾਂ ਨੂੰ ਗ੍ਰਿਫਤਾਰ ਕਰ ਲਿਆ। ਇਸ ਮਾਮਲੇ ਵਿੱਚ ਕੋਤਾਹੀ ਨਿਕਲਣ ਉੱਤੇ ਪੁਲਸ ਕਾਂਸਟੇਬਲ ਨੂੰ ਨੌਕਰੀ ਤੋਂ ਬਰਖਾਸਤ ਕਰ ਦਿੱਤਾ ਗਿਆ ਹੈ।
ਪੁਲਸ ਕਮਿਸ਼ਨਰ ਰਾਕੇਸ਼ ਅਗਰਵਾਲ ਨੇ ਦੱਸਿਆ ਕਿ ਫੜੇ ਗਏ ਦੋਸ਼ੀਆਂ ਦੀ ਪਛਾਣ ਪਿੰਡ ਬਾੜੇਵਾਲ ਅਵਾਣ ਦਾ ਧਰਮਿੰਦਰ ਸਿੰਘ ਉਰਫ ਟਿੰਕੂ, ਟਿੱਬਾ ਦੇ ਸੁਤੰਤਰ ਨਗਰ ਦਾ ਜਸਵੀਰ ਸਿੰਘ ਉਰਫ ਵਿਜੇ ਉਰਫ ਕਾਕਾ, ਉਸ ਦੀ ਪਤਨੀ ਅੰਜੂ ਅਤੇ ਪਿੰਡ ਬਾੜੇਵਾਲ ਅਵਾਣਾ ਦਾ ਦਵਿੰਦਰ ਪਾਲ ਦੇ ਰੂਪ ਵਿੱਚ ਹੋਈ ਹੈ। ਪੁਲਸ ਦੀ ਸੀ ਆਈ ਏ-1 ਟੀਮ ਨੇ ਉਨ੍ਹਾਂ ਨੂੰ ਕਾਬੂ ਕਰ ਲਿਆ ਅਤੇ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਅਸਲ ਵਿੱਚ ਸ਼ੁੱਕਰਵਾਰ ਸਵੇਰੇ ਹੋਰਾਂ ਕੈਦੀਆਂ ਦੇ ਨਾਲ ਧਰਮਿੰਦਰ ਉਰਫ ਟਿੰਕੂ ਨੂੰ ਅਦਾਲਤ ਵਿੱਚ ਪੇਸ਼ੀ ਉੱਤੇ ਲਿਆਂਦਾ ਗਿਆ। ਏਥੋਂ ਕਾਂਸਟੇਬਲ ਭੁਪਿੰਦਰ ਸਿੰਘ ਉਸ ਨੂੰ ਹਥਕੜੀ ਲਾ ਕੇ ਅਦਾਲਤ ਵਿੱਚ ਪੇਸ਼ ਕਰਨ ਲਈ ਲੈ ਗਿਆ ਤਾਂ ਪੇਸ਼ੀ ਮਗਰੋਂ ਦੁਪਹਿਰ ਇੱਕ ਵਜੇ ਦੋਸ਼ੀ ਨੇ ਭੁਪਿੰਦਰ ਸਿੰਘ ਨੂੰ ਆਪਣੀ ਬੀਮਾਰ ਮਾਂ ਨੂੰ ਮਿਲਣ ਦਾ ਤਰਲਾ ਮਾਰਿਆ। ਪਹਿਲਾਂ ਤੋਂ ਰਚੀ ਸਾਜ਼ਿਸ ਹੇਠ ਉਸ ਨੇ ਜਸਵੀਰ, ਮੰਜੂ ਤੇ ਦਵਿੰਦਰ ਨੂੰ ਕਚਹਿਰੀ ਸੱਦ ਲਿਆ ਸੀ। ਤਿੰਨੇ ਬ੍ਰੀਜਾ ਕਾਰ ਲੈ ਕੇ ਕਚਹਿਰੀ ਪਹੁੰਚ ਗਏ ਅਤੇ ਕਾਰ ਟਿੰਕੂ ਦੇ ਨਾਂਅ 'ਤੇ ਰਜਿਸਟਰਡ ਹੈ। ਕਾਰ ਵਿੱਚ ਬੈਠ ਕੇ ਪੰਜੇ ਜਣੇ ਧਰਮਿੰਦਰ ਦੇ ਬਾੜੇਵਾਲ ਵਾਲੇ ਘਰ ਪਹੁੰਚੇ। ਉਥੇ ਭੁਪਿੰਦਰ ਨੇ ਧਰਮਿੰਦਰ ਦੀ ਹਥਕੜੀ ਖੋਲ੍ਹ ਕੇ ਕਾਰ ਵਿੱਚ ਰੱਖ ਦਿੱਤੀ। ਦੁਪਹਿਰ ਡੇਢ ਵਜੇ ਦੋਸ਼ੀ ਟਿੰਕੂ ਨੇ ਆਪਣੀ ਮਾਂ ਦੀ ਦਵਾ ਲਿਆਉਣ ਦਾ ਬਹਾਨਾ ਬਣਾਇਆ ਅਤੇ ਸਾਥੀਆਂ ਨਾਲ ਉਥੋਂ ਫਰਾਰ ਹੋ ਗਿਆ।
ਇਸ ਦੇ ਬਾਅਦ ਭੁਪਿੰਦਰ ਨੇ ਸ਼ਾਮ ਚਾਰ ਵਜੇ ਕਚਹਿਰੀ ਵਾਪਸ ਆ ਕੇ ਟਿੰਕੂ ਦੇ ਭੱਜ ਜਾਣ ਦਾ ਰੌਲਾ ਪਾਇਆ ਸੀ। ਪੁਲਸ ਕਮਿਸ਼ਨਰ ਨੇ ਦੱਸਿਆ ਕਿ ਦੋਸ਼ੀਆਂ ਨੇ ਲੁਧਿਆਣਾੇ ਤੋਂ ਨਿਕਲਣ ਲਈ ਬ੍ਰੀਜਾ ਕਾਰ 'ਤੇ ਫਰਜ਼ੀ ਨੰਬਰ ਪਲੇਟ ਲਵਾਈ ਸੀ। ਪੁਲਸ ਦੀ ਸੀ ਆਈ ਏ ਟੀਮ ਅਤੇ ਐਂਟੀ ਨਾਰਕੋਟਿਕ ਸੈੱਲ ਟੀਮ ਨੇ ਦੋ ਮਹੀਨੇ ਪਹਿਲਾਂ ਸਾਂਝੀ ਕਾਰਵਾਈ ਹੇਠ ਧਰਮਿੰਦਰ ਨੂੰ ਇੱਕ ਕਿਲੋ ਹੈਰੋਇਨ ਤੇ ਸਾਢੇ ਸੱਤ ਲੱਖ ਦੀ ਨਕਦੀ ਨਾਲ ਫੜਿਆ ਸੀ। ਪੁੱਛਗਿੱਛ ਦੇ ਬਾਅਦ ਉਸ ਦੇ ਕਬਜ਼ੇ ਵਿੱਚੋਂ ਦਸ ਦਿਨ ਪਹਿਲਾਂ ਖਰੀਦੀ ਬ੍ਰਾਂਡ ਨਿਊ 17 ਲੱਖ ਕੀਮਤ ਦੀ ਕਾਰ ਵੀ ਮਿਲੀ ਸੀ। ਉਸ ਦੇ ਖਿਲਾਫ ਪਹਿਲਾਂ ਵੀ ਵੱਖ-ਵੱਖ ਥਾਣਿਆਂ ਵਿੱਚ 11 ਕੇਸ ਦਰਜ ਹਨ। ਪੁਲਸ ਸਾਰੇ ਦੋਸ਼ੀਆਂ ਤੋਂ ਸਖਤੀ ਨਾਲ ਪੁੱਛਗਿੱਛ ਕਰ ਰਹੀ ਹੈ।