ਵਾਸਿੰ਼ਗਟਨ, 6 ਅਕਤੂਬਰ (ਪੋਸਟ ਬਿਊਰੋ) : ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਦੀ ਯੂਕਰੇਨ ਨਾਲ ਹੋਈ ਡੀਲਿੰਗ ਬਾਰੇ ਇੱਕ ਹੋਰ ਵ੍ਹਿਸਲਬਲੋਅਰ ਸਾਹਮਣੇ ਆਇਆ ਹੈ। ਇਸ ਦੇ ਨਾਲ ਹੀ ਟਰੰਪ ਖਿਲਾਫ ਇੰਪੀਚਮੈਂਟ ਸਬੰਧੀ ਕੀਤੀ ਜਾਣ ਵਾਲੀ ਜਾਂਚ ਦੇ ਮੁੱਦੇ ਨੂੰ ਹੋਰ ਬਲ ਮਿਲ ਗਿਆ ਹੈ। ਇਸ ਇੰਪੀਚਮੈਂਟ ਲਈ ਡੈਮੋਕ੍ਰੈਟਸ ਦਾ ਪੱਖ ਹੋਰ ਮਜ਼ਬੂਤ ਹੋਇਆ ਹੈ।
ਦੋਵਾਂ ਵ੍ਹਿਸਲਬਲੋਅਰਜ਼ ਦੀ ਨੁਮਾਇੰਦਗੀ ਕਰਨ ਵਾਲੇ ਅਟਾਰਨੀ ਮਾਰਕ ਜ਼ਾਇਦ ਨੇ ਆਖਿਆ ਕਿ ਦੂਜੇ ਵ੍ਹਿਸਲਬਲੋਅਰ ਨੇ ਖੁਫੀਆ ਕਮਿਊਨਿਟੀ ਦੇ ਅੰਤਰਿਮ ਵਾਚਡੌਗ ਨਾਲ ਗੱਲ ਕੀਤੀ ਹੈ ਤੇ ਉਹ ਪਹਿਲੇ ਵ੍ਹਿਸਲਬਲੋਅਰ ਦੀ ਸਿ਼ਕਾਇਤ ਵਿੱਚ ਸਹਿਯੋਗ ਦੇ ਸਕਦਾ ਹੈ। ਉਸ ਦਸਤਾਵੇਜ਼ ਵਿੱਚ ਇਹ ਦੋਸ਼ ਲਾਇਆ ਗਿਆ ਸੀ ਕਿ ਟਰੰਪ ਵੱਲੋਂ ਯੂਕਰੇਨ ਦੇ ਰਾਸ਼ਟਰਪਤੀ ਉੱਤੇ ਡੈਮੋਕ੍ਰੈਟਿਕ ਪਾਰਟੀ ਦੇ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਜੋਅ ਬਾਇਡਨ ਦੇ ਪਰਿਵਾਰ ਦੀ ਜਾਂਚ ਲਈ ਦਬਾਅ ਪਾਇਆ ਗਿਆ ਸੀ। ਜ਼ਾਇਦ ਨੇ ਆਖਿਆ ਕਿ ਦੂਜੇ ਵ੍ਹਿਸਲਬਲੋਅਰ ਵੱਲੋਂ ਰੱਖੀ ਜਾਣ ਵਾਲੀ ਗੱਲ ਇਸ ਲਈ ਵੀ ਅਹਿਮ ਹੈ ਕਿਉਂਕਿ ਉਹ ਇੰਟੈਲੀਜੈਂਸ ਦੇ ਖੇਤਰ ਵਿੱਚ ਹੀ ਕੰਮ ਕਰਦਾ ਹੈ ਤੇ ਕਈ ਅਹਿਮ ਮਾਮਲਿਆਂ ਦੀ ਉਸ ਕੋਲ ਪ੍ਰਤੱਖ ਜਾਣਕਾਰੀ ਹੈ।
ਦੂਜੇ ਵ੍ਹਿਸਲਬਲੋਅਰ ਦੇ ਸਾਹਮਣੇ ਆਉਣ ਨਾਲ ਟਰੰਪ ਤੇ ਉਨ੍ਹਾਂ ਦੇ ਸਹਿਯੋਗੀਆਂ ਵੱਲੋਂ ਮੂਲ ਸਿ਼ਕਾਇਤ ਝੂਠੀ ਹੋਣ ਦੇ ਕੀਤੇ ਜਾ ਰਹੇ ਦਾਅਵਿਆਂ ਉੱਤੇ ਸਵਾਲ ਖੜ੍ਹੇ ਹੋ ਗਏ ਹਨ। ਉਨ੍ਹਾਂ ਵੱਲੋਂ ਅਜੇ ਵੀ ਇਸ ਨੂੰ ਸਿਆਸੀ ਤੌਰ ਉੱਤੇ ਪ੍ਰੇਰਿਤ ਦੱਸਿਆ ਜਾ ਰਿਹਾ ਹੈ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਮੂਲ ਸਿ਼ਕਾਇਤ ਉੱਤੇ ਯਕੀਨ ਨਹੀਂ ਕੀਤਾ ਜਾ ਸਕਦਾ ਕਿਉਂਕਿ ਉਹ ਜਾਣਕਾਰੀ ਸੈਕਿੰਡਹੈਂਡ ਜਾਂ ਥਰਡਹੈਂਡ ਹੈ। ਟਰੰਪ ਵੱਲੋਂ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੈਲੈਂਸਕੀ ਨਾਲ ਕੀਤੀ ਗਈ ਗੱਲਬਾਤ ਦੀ ਜਾਰੀ ਕੀਤੀ ਗਈ ਟਰਾਂਸਕ੍ਰਿਪਟ ਤੋਂ ਵੀ ਇਹੋ ਸਾਹਮਣੇ ਆਇਆ ਹੈ ਕਿ ਬਾਇਡਨਜ਼ ਖਿਲਾਫ ਜਾਂਚ ਲਈ ਟਰੰਪ ਵੱਲੋਂ ਜ਼ੈਲੈਂਸਕੀ ਉੱਤੇ ਦਬਾਅ ਪਾਇਆ ਗਿਆ। ਹਾਲਾਂਕਿ ਸਾਬਕਾ ਵਾਈਸ ਪ੍ਰੈਜ਼ੀਡੈਂਟ ਜਾਂ ਉਨ੍ਹਾਂ ਦੇ ਬੇਟੇ ਹੰਟਰ, ਜੋ ਕਿ ਯੂਕਰੇਨੀਆਈ ਗੈਸ ਕੰਪਨੀ ਵਿੱਚ ਕੰਮ ਕਰਦੇ ਸਨ, ਵੱਲੋਂ ਕਿਸੇ ਵੀ ਗੜਬੜੀ ਦਾ ਕੋਈ ਸਬੂਤ ਨਹੀਂ ਹੈ ਪਰ ਫਿਰ ਵੀ ਇਸ ਤਰ੍ਹਾਂ ਦਾ ਦਬਾਅ ਟਰੰਪ ਵੱਲੋਂ ਪਾਇਆ ਗਿਆ।
ਵਿਦੇਸ਼ ਮੰਤਰਾਲੇ ਦੇ ਅਧਿਕਾਰੀਆਂ ਵੱਲੋਂ ਟੈਕਸਟ ਮੈਸੇਜਿਜ਼ ਸਬੰਧੀ ਕੀਤੇ ਗਏ ਹੋਰ ਖੁਲਾਸੇ ਤੋਂ ਸਾਹਮਣੇ ਆਇਆ ਹੈ ਕਿ ਟਰੰਪ ਵੱਲੋਂ ਇਸ ਸ਼ਰਤ ਉੱਤੇ ਯੂਕਰੇਨ ਦਾ ਦੌਰਾ ਕਰਨ ਦਾ ਵਾਅਦਾ ਕੀਤਾ ਗਿਆ ਸੀ ਕਿ ਜੇ ਸਰਕਾਰ 2016 ਦੀਆਂ ਚੋਣਾਂ ਅਤੇ ਯੂਕਰੇਨ ਦੀ ਬਰਿਜ਼ਮਾ ਗੈਸ ਕੰਪਨੀ ਦੀ ਜਾਂਚ ਲਈ ਸਹਿਮਤ ਹੋਵੇਗੀ।