ਅੰਮ੍ਰਿਤਸਰ, 3 ਅਕਤੂਬਰ, (ਪੋਸਟ ਬਿਊਰੋ)- ਪੁਲਿਸ ਚੌਕੀ ਤੋਂ ਕੁਝ ਕਦਮ ਦੂਰ ਟਰਾਂਸਪੋਰਟਰਾਂ ਦੇ ਕਾਰਿੰਦਿਆਂ ਨੇ ਅੱਜ ਵੀਰਵਾਰ ਨੂੰ ਅੱਡੇ ਅੰਦਰ ਗੋਲ਼ੀਆਂ ਚਲਾ ਕੇ ਦਹਿਸ਼ਤ ਫੈਲਾ ਦਿੱਤੀ। ਕਰੀਬ7ਤੋਂ 10 ਗੋਲੀਆਂ ਚੱਲੀਆਂ, ਪਰ ਨੁਕਸਾਨ ਹੋਣ ਦੀ ਕੋਈ ਖ਼ਬਰ ਨਹੀਂ ਹੈ। ਦੋਸ਼ੀਆਂ ਨੇ ਬੱਸਾਂ ਦੀ ਭੰਨਤੋੜ ਕੀਤੀ ਤਾਂ ਓਥੇ ਬੈਠੇ ਸੈਂਕੜੇ ਮੁਸਾਫਰ ਡਰ ਕਾਰਨ ਏਧਰ-ਓਧਰ ਭੱਜਣ ਲੱਗ ਪਏ। ਕਰੀਬ 25-30 ਨਕਾਬਪੋਸ਼ ਹਮਲਾਵਰ 10 ਮਿੰਟ ਤਕ ਘਟਨਾ ਵਾਲੀ ਥਾਂ ਉੱਤੇ ਪਿਸਤੌਲ, ਰਾਡ ਅਤੇ ਬੇਸਬੇਟ ਲਹਿਰਾ ਕੇ ਅਤੇ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇ ਕੇ ਖਿਸਕ ਗਏ।ਪਿੱਛੋਂ ਪੁਲਿਸ ਨੇ ਕੁਝ ਸ਼ੱਕੀ ਲੋਕਾਂ ਨੂੰ ਫੜਿਆ ਹੈ ਅਤੇ ਬੱਸ ਅੱਡੇ ਦੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਕਢਵਾਈ ਜਾ ਰਹੀ ਹੈ।
ਮੌਕੇ ਉੱਤੇਹਾਜ਼ਰ ਲੋਕਾਂ ਨੇ ਦੱਸਿਆ ਕਿ ਉਹ ਬੱਸ ਅੱਡੇ ਉੱਤੇ ਆਪਣੀ ਬੱਸ ਦੀ ਉਡੀਕ ਕਰ ਰਹੇ ਸਨ, ਜਦੋਂ ਦੋ ਟਰਾਂਸਪੋਰਟ ਕੰਪਨੀਆਂ ਦੇ ਕਾਰਿੰਦਿਆਂਦਾ ਵਿਵਾਦ ਸ਼ੁਰੂ ਹੋ ਗਿਆ। ਉਹ ਬੱਸਾਂ ਦੇ ਟਾਈਮ ਟੇਬਲ ਬਾਰੇ ਇਕ-ਦੂਜੇ ਨਾਲ ਗਾਲ਼ੀ-ਗਲੋਚ ਕਰ ਰਹੇ ਸਨ। ਮੌਕੇ ਉੱਤੇ ਮੌਜੂਦ ਠੇਕੇਦਾਰਾਂ ਅਤੇ ਬੱਸ ਚਾਲਕਾਂ ਨੇ ਦੋਵੇਂ ਧਿਰਾਂ ਦਾ ਕਿਸੇ ਤਰ੍ਹਾਂ ਰਾਜ਼ੀਨਾਮਾ ਕਰਵਾ ਦਿੱਤਾ, ਪਰ 10-15 ਮਿੰਟਾਂ ਬਾਅਦ ਇਕ ਟਰਾਂਸਪੋਰਟਰ ਦੇ ਬੰਦੇ ਹਥਿਆਰਾਂ ਨਾਲ ਲੈਸ ਹੋ ਕੇ ਅੱਡੇ ਉੱਤੇ ਪਹੁੰਚ ਗਏ। ਇਨ੍ਹਾਂ ਆਉਂਦੇ ਸਾਰ ਹਵਾ ਵਿੱਚ ਤਾਬੜਤੋੜ ਫਾਇਰਿੰਗ ਸ਼ੁਰੂ ਕਰ ਦਿੱਤੀ। ਕਰੀਬ ਸੱਤ ਤੋਂ ਦਸ ਗੋਲ਼ੀਆਂ ਚੱਲਣ ਤੋਂ ਬਾਅਦ ਚਾਰੇ ਪਾਸੇ ਦਹਿਸ਼ਤ ਦਾ ਮਾਹੌਲ ਬਣ ਗਿਆ। ਨਕਾਬਪੋਸ਼ਾਂ ਨੇ ਬੇਸਬੇਟ, ਹਾਕੀ ਤੇ ਦਾਤਰਾਂ ਨਾਲ ਬੱਸਾਂ ਉੱਤੇ ਵਾਰ ਕਰਨੇ ਸ਼ੁਰੂ ਕਰ ਦਿੱਤਾ ਤੇ ਕੁਝ ਬੱਸਾਂ ਦੇ ਸ਼ੀਸ਼ੇ ਤੋੜ ਦਿੱਤੇ ਗਏ। ਉਨ੍ਹਾਂ ਦੀ ਗੁੰਡਾਗਰਦੀ ਅੱਗੇ ਕਿਸੇ ਦੀ ਹਿੰਮਤ ਨਹੀਂ ਸੀ ਕਿ ਉਨ੍ਹਾਂ ਨੂੰ ਰੋਕ ਸਕੇ। ਬੱਸ ਅੱਡੇ ਉੱਤੇ ਗੁੰਡਾਗਰਦੀ ਦਾ ਨਾਚ ਦੇਖ ਕੇ ਯਾਤਰੀਆਂ ਵਿੱਚ ਜਾਨ ਬਚਾਉਣ ਦੀ ਭਾਜੜ ਮੱਚ ਗਈ। ਇਸਤੋਂ ਬਾਅਦ ਦੋਸ਼ੀ ਧਮਕੀਆਂ ਦਿੰਦੇ ਹੋਏ ਫ਼ਰਾਰ ਹੋ ਗਏ। ਘਟਨਾ ਤੋਂ 10-15 ਮਿੰਟ ਪਿੱਛੋਂ ਪੁਲਿਸ ਮੌਕੇ ਉੱਤੇ ਪਹੁੰਚੀ। ਇਸ ਮੌਕੇ ਓਥੇ ਮੌਜੂਦ ਰਾਜ ਕੁਮਾਰ ਦੇ ਮੁਤਾਬਕ ਜਦੋਂ ਨਕਾਬਪੋਸ਼ਾਂ ਨੇ ਗੋਲ਼ੀਆਂ ਚਲਾਈਆਂ ਤਾਂ ਤਿੰਨ ਕੁ ਪੁਲਿਸ ਵਾਲੇ ਓਥੇਸਨ, ਪਰ ਦਰਸ਼ਕ ਬਣੇ ਦੇਖਦੇ ਰਹੇ, ਕਿਸੇ ਵਿੱਚ ਹਿੰਮਤ ਨਹੀਂ ਸੀ ਕਿ ਉਹ ਉਨ੍ਹਾਂ ਨੂੰ ਰੋਕ ਸਕਣ। ਰਾਮ ਬਾਗ ਥਾਣੇ ਦੇ ਮੁਖੀ ਨੀਰਜ ਕੁਮਾਰ ਨੇ ਦੱਸਿਆ ਕਿ ਅਣਪਛਾਤੇ ਬੰਦਿਆਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆਹੈ।