ਵਾਸ਼ਿੰਗਟਨ, 3 ਅਕਤੂਬਰ, (ਪੋਸਟ ਬਿਊਰੋ)- ਦੂਸਰੀ ਸੰਸਾਰ ਜੰਗਦੇ ਦੌਰਾਨ ਅਮਰੀਕਾ ਵੱਲੋਂਵਰਤਿਆ ਜਾਂਦਾ ਰਿਹਾ ਬੀ-17 ਬੰਬਾਰ ਜਹਾਜ਼ ਕੱਲ੍ਹ ਕਨੈਕਟੀਕਟ ਰਾਜ ਦੇ ਹਵਾਈ ਅੱਡੇ ਉੱਤੇ ਐਮਰਜੈਂਸੀ ਲੈਂਡਿੰਗ ਵੇਲੇ ਹਾਦਸੇ ਦਾ ਸ਼ਿਕਾਰ ਹੋ ਗਿਆ। ਹਾਰਟਫੋਰਡ ਦੇ ਬ੍ਰੈਡਲੀ ਇੰਟਰਨੈਸ਼ਨਲ ਏਅਰਪੋਰਟ ਉੱਤੇ ਉਤਰਨ ਸਮੇਂ ਇਹ ਬੁੱਢਾ ਜਹਾਜ਼ ਰੰਨਵੇਤੋਂ ਤਿਲਕ ਕੇ ਜਹਾਜ਼ਾਂ ਦੀ ਸੰਭਾਲ ਲਈ ਬਣਾਏ ਹੋਏ ਸੈਂਟਰ ਨਾਲ ਜਾ ਵੱਜਾ। ਬੁੱਧਵਾਰ ਸਵੇਰੇ ਹੋਏ ਇਸ ਹਾਦਸੇ ਵਿੱਚ ਸੱਤ ਲੋਕਾਂ ਦੀ ਮੌਤ ਹੋ ਗਈ। ਇਸ ਹਾਦਸੇ ਕਾਰਨ ਏਅਰਪੋਰਟ ਦਾ ਰੰਨਵੇ ਕਈ ਘੰਟੇ ਤਕ ਬੰਦ ਰੱਖਣਾ ਪਿਆ।
ਕਨੈਕਟੀਕਟ ਹਵਾਈ ਅੱਡਾ ਅਥਾਰਟੀ ਦੇ ਕਾਰਜਕਾਰੀ ਡਾਇਰੈਕਟਰ ਕੇਵਿਨ ਡਿਲਨ ਦੇਮੁਤਾਬਕ ਉਡਾਣ ਭਰਨ ਤੋਂ 10 ਮਿੰਟ ਬਾਅਦ ਕਿਸੇ ਗੜਬੜ ਦਾ ਪਤਾ ਲੱਗਣ ਉੱਤੇ ਬੋਇੰਗ ਬੀ-17 ਫਲਾਇੰਗ ਫੋਰਟਰੇਸ ਜਹਾਜ਼ ਦੀ ਲੈਂਡਿੰਗ ਦੇ ਪ੍ਰਬੰਧ ਕਰਨ ਪਿੱਛੋਂ ਜਦੋਂ ਉਹ ਲੈਂਡ ਕਰਨ ਲੱਗਾ ਤਾਂ ਹਾਦਸਾ ਹੋ ਗਿਆ। ਇਸ ਜਹਾਜ਼ ਵਿਚਲੇ 13 ਲੋਕਾਂ ਵਿੱਚੋਂ ਸੱਤਾਂ ਦੀ ਮੌਤ ਹੋ ਗਈ ਤੇ ਛੇ ਜ਼ਖ਼ਮੀ ਹੋ ਗਏ। ਹਾਦਸੇ ਕਾਰਨ ਅਸਮਾਨ ਵਿੱਚ ਕਾਲੇ ਧੂੰਏਂ ਦਾ ਗ਼ੁਬਾਰ ਛਾ ਗਿਆ ਸੀ।
ਬੋਇੰਗ ਬੀ-17 ਜਹਾਜ਼ ਦੀ ਪਹਿਲੀ ਉਡਾਣ ਸਾਲ 1935 ਵਿੱਚ ਹੋਈ ਸੀ। ਦੂਸਰੀ ਸੰਸਾਰ ਜੰਗ ਤੋਂ ਪਹਿਲਾਂ ਅਤੇ ਬਾਅਦ ਵਿੱਚ 12,700 ਬੀ-17 ਜਹਾਜ਼ ਬਣੇ ਸਨ। ਉਸ ਜੰਗ ਵੇਲੇ ਜਰਮਨ ਕਬਜ਼ੇ ਦੇ ਖੇਤਰਾਂ ਉੱਤੇ ਅਮਰੀਕੀ ਜਹਾਜ਼ਾਂ ਨੇ ਕਰੀਬ 15 ਲੱਖ ਟਨ ਵਜ਼ਨ ਦੇ ਬੰਬ ਸੁੱਟੇ, ਜਿਨ੍ਹਾਂ ਵਿੱਚੋਂ ਛੇ ਲੱਖ 40 ਹਜ਼ਾਰ ਟਨ ਬੰਬ ਇਨ੍ਹਾਂ ਜਹਾਜ਼ਾਂ ਨੇ ਸੁੱਟੇ ਸਨ।