ਭੂਮੀ ਪੇਡਨੇਕਰ ਨੂੰ ਇੱਕ ਅਨੋਖਾ ਸ਼ੌਕ ਹੈ। ਉਹ ਆਪਣੀ ਹਰ ਫਿਲਮੀ ਸੈੱਟ ਤੋਂ ਯਾਦਗਾਰ ਲਈ ਕੁਝ ਖਾਸ ਚੀਜ਼ਾਂ ਆਪਣੇ ਕੋਲ ਰੱਖ ਲੈਂਦੀ ਹੈ। ਉਸ ਦੇ ਅਜਿਹਾ ਕਰਨ ਦੀ ਵਜ੍ਹਾ ਹੈ ਕਿ ਉਹ ਆਪਣਆਂ ਫਿਲਮਾਂ ਅਤੇ ਕਿਰਦਾਰਾਂ ਨਾਲ ਦਿਲੋਂ ਜੁੜ ਜਾਂਦੀ ਹੈ ਅਤੇ ਉਨ੍ਹਾਂ ਤੋਂ ਖੁਦ ਨੂੰ ਜੁਦਾ ਕਰਨਾ ਉਸ ਲਈ ਆਸਾਨ ਨਹੀਂ ਹੁੰਦਾ। ਇਸ ਲਈ ਉਹ ਉਸ ਨਾਲ ਜੁੜੀਆਂ ਯਾਦਾਂ ਵਜੋਂ ਕੁਝ ਚੀਜ਼ਾਂ ਹਮੇਸ਼ਾ ਲਈ ਆਪਣੇ ਕੋਲ ਰੱਖ ਲੈਂਦੀ ਹੈ। ਉਸ ਨੇ ਕਿਹਾ, ‘‘ਅੱਜ ਤੱਕ ਜਿੰਨੀਆਂ ਵੀ ਫਿਲਮਾਂ ਮੈਂ ਕੀਤੀਆਂ ਹਨ, ਉਸ ਵਿੱਚ ਸਮਰਪਣ, ਸਮਾਂ ਅਤੇ ਆਪਣੇ ਕਿਰਦਾਰ ਵਿੱਚ ਡੁੱਬ ਜਾਣਾ ਸ਼ਾਮਲ ਸੀ। ਇਸ ਦੌਰਾਨ ਮੈਂ ਉਸ ਨਾਲ ਭਾਵਨਾਤਮਕ ਪੱਖੋਂ ਜੁੜ ਜਾਂਦੀ ਅਤੇ ਆਪਣੇ ਕਿਰਾਦਰਾਂ ਨਾਲ ਜੁੜੀਆਂ ਇੱਕ-ਦੋ ਚੀਜ਼ਾਂ ਨਾਲ ਲੈ ਆਉਂਦੀ ਹਾਂ।”
ਆਪਣੀ ਫਿਲਮ ‘ਸੋਨ ਚਿਰੱਈਆ’ ਦੇ ਸੈੱਟ ਤੋਂ ਉਸ ਨੇ ਇੱਕ ਸਾੜ੍ਹੀ ਲਿਆਂਦੀ ਤਾਂ ਫਿਲਮ ‘ਟਾਇਲੈਟ-ਏਕ ਪ੍ਰੇਮ ਕਥਾ' ਦੇ ਸੈੱਟ ਤੋਂ ਇੱਕ ਲੋਟਾ ਉਸ ਨੇ ਲਿਆ ਸੀ। ਫਿਲਮ ‘ਦਮ ਲਗਾ ਕੇ ਹਈਸ਼ਾ’ ਵਿੱਚ ਪਹਿਨੀ ਇੱਕ ਗੁਲਾਬੀ ਰੰਗ ਦੀ ਨਾਈਟੀ ਉਸ ਨੇ ਆਪਣੇ ਕੋਲ ਰੱਖੀ, ‘ਲਸਟ ਸਟੋਰੀਜ਼’ ਵਿਚ ਨੌਕਰਾਣੀ ਦੇ ਰੋਲ ਵਿੱਚ ਪਹਿਨੀ ਜਿਊਲਰੀ ਅਤੇ ‘ਸ਼ੁਭ ਮੰਗਲ ਸਾਵਧਾਨ’ ਤੋਂ ਉਸ ਨੇ ਕੁਝ ਕੱਪੜਿਆਂ ਨੂੰ ਲਿਆ ਹੈ। ਉਹ ਕਹਿੰਦੀ ਹੈ, ‘‘ਇਸ ਤੋਂ ਇਲਾਵਾ ਮੇਰੇ ਕਮਰੇ ਵਿੱਚ ਮੇਰੀਆਂ ਸਾਰੀਆਂ ਫਿਲਮਾਂ ਦਾ ਇੱਕ ਕਲੈਪ ਬੋਰਡ ਲੱਗਾ ਹੈ। ਰੋਜ਼ ਸਵੇਰੇ ਉਠ ਕੇ ਆਪਣੀਆਂ ਅੱਜ ਤੱਕ ਦੀਆਂ ਫਿਲਮਾਂ ਦੇ ਪੋਸਟਰ ਸਾਹਮਣੇ ਰੱਖ ਕੇ ਬਹੁਤ ਚੰਗਾ ਲੱਗਦਾ ਹੈ।”