ਲੁਧਿਆਣਾ, 3 ਅਕਤੂਬਰ (ਪੋਸਟ ਬਿਊਰੋ)- ਸਰਕਾਰੀ ਨੌਕਰੀ ਦਿਵਾਉਣ ਦੇ ਨਾਂਅ 'ਤੇ ਇੱਕ ਮਹਿਲਾ ਨਾਲ 8.50 ਲੱਖ ਦੀ ਠੱਗੀ ਦੇ ਬਾਰੇ ਥਾਣਾ ਡਵੀਜ਼ਨ ਨੰਬਰ ਪੰਜ ਦੀ ਪੁਲਸ ਨੇ ਪੀੜਤ ਰੂਹੀ ਛਾਬੜਾ ਵਾਸੀ ਲੇਬਰ ਕਲੋਨੀ ਦੇ ਬਿਆਨਾਂ 'ਤੇ ਹੈਬੋਵਾਲ ਵਾਸੀ ਲਲਿਤ ਨਈਅਰ ਦੇ ਖਿਲਾਫ ਪਰਚਾ ਦਰਜ ਕੀਤਾ ਹੈ। ਫਿਲਹਾਲ ਦੋਸ਼ੀ ਫਰਾਰ ਹੈ।
ਰੂਹੀ ਨੇ ਪੁਲਸ ਨੂੰ ਦੱਸਿਆ ਕਿ ਉਹ ਫਿਰੋਜ਼ ਗਾਂਧੀ ਮਾਰਕੀਟ ਵਿੱਚ ਐੱਚ ਡੀ ਐੱਫ ਸੀ ਬੈਂਕ ਦੀ ਲੋਕੇਸ਼ਨ ਏਜੰਸੀ ਵਿੱਚ ਕੈਸ਼ੀਅਰ ਦੀ ਨੌਕਰੀ ਕਰਦੀ ਹੈ। ਇਥੇ ਦੋਸ਼ੀ ਲਲਿਤ ਦੀ ਡਸਟਰ ਗੱਡੀ ਤੇ ਬੁਲੇਟ ਬਾਈਕ ਦਾ ਕਰਜ਼ਾ ਚੱਲਦਾ ਹੈ। ਅਕਸਰ ਉਹ ਕਿਸ਼ਤ ਜਮ੍ਹਾ ਕਰਾਉਣ ਆਉਂਦਾ ਸੀ। ਅਕਤੂਬਰ 2018 ਵਿੱਚ ਦੋਸ਼ੀ ਉਨ੍ਹਾਂ ਦੀ ਏਜੰਸੀ ਵਿੱਚ ਆਇਆ ਤੇ ਉਸ ਦੀ ਤਨਖਾਹ ਅਤੇ ਬਾਕੀ ਡਿਟੇਲ ਪੁੱਛਣ ਲੱਗਾ ਅਤੇ ਕਿਹਾ ਕਿ ਉਹ ਉਸ ਨੂੰ ਪੰਜਾਬ ਐਂਡ ਸਿੰਧ ਬੈਂਕ ਦੀ ਨੌਕਰੀ 'ਤੇ ਲਗਵਾ ਦੇਵੇਗਾ, ਕਿਉਂਕਿ ਉਸ ਦੀ ਬੈਂਕ ਈ ਡੀ ਦੇ ਪੀ ਏ ਨਾਲ ਜਾਣ ਪਛਾਣ ਹੈ, ਪਰ ਇਸ ਲਈ 10 ਲੱਖ ਰੁਪਏ ਦੇਣੇ ਪੈਣਗੇ। ਪੀੜਤ ਨੇ ਕਿਹਾ ਕਿ ਉਹ ਇੰਨੇ ਪੈਸੇ ਨਹੀਂ ਦੇ ਸਕਦੀ। ਅਖੀਰ ਸਾਢੇ ਅੱਠ ਲੱਖ ਦਾ ਸੌਦਾ ਤੈਅ ਹੋਇਆ। ਦੋਸ਼ੀ ਨੇ ਉਸ ਨੂੰ ਦੋ ਅਕਾਊਂਟ ਨੰਬਰ ਦਿੱਤੇ ਜਿਸ ਵਿੱਚੋਂ ਇਕ ਲਲਿਤ ਦੇ ਨਾਂਅ ਤੇ ਦੂਸਰਾ ਸਾਜਿਦ ਖਾਨ ਦਾ ਸੀ। ਦਸੰਬਰ 2018 ਤੋਂ ਜਨਵਰੀ 2019 ਤੱਕ ਦੋਸ਼ੀਆਂ ਨੇ ਸਾਢੇ ਅੱਠ ਲੱਖ ਰੁਪਏ ਟਰਾਂਸਫਰ ਕਰਵਾ ਲਏ। ਫਿਰ ਉਨ੍ਹਾਂ ਨੇ ਫੋਨ ਚੁੱਕਣਾ ਬੰਦ ਕਰ ਦਿੱਤਾ, ਸਗੋਂ ਇਹ ਕਿਹਾ ਕਿ ਜਿਸ ਨੂੰ ਸ਼ਿਕਾਇਤ ਕਰਨੀ ਹੈ, ਕਰ ਦਿਓ, ਪੁਲਸ ਦੇ ਵੱਡੇ ਅਧਿਕਾਰੀ ਉਸ ਦੇ ਜਾਣੂ ਹਨ। ਪੀੜਤ ਨੇ ਪ੍ਰੇਸ਼ਾਨ ਹੋ ਕੇ ਸ਼ਿਕਾਇਤ ਕੀਤੀ। ਜਾਂਚ ਦੇ ਬਾਅਦ ਪੁਲਸ ਨੇ ਦੋਸ਼ੀ ਨੂੰ ਸੱਦਿਆ ਤਾਂ ਪੇਸ਼ ਨਹੀਂ ਹੋਇਆ।