ਜਲੰਧਰ, 3 ਅਕਤੂਬਰ (ਪੋਸਟ ਬਿਊਰੋ)- ਬੀਬੀ ਭਾਨੀ ਕੰਪਲੈਕਸ ਦੇ ਵਿਵਾਦ ਵਿੱਚ ਜਲੰਧਰ ਇੰਪਰੂਵਮੈਂਟ ਟਰੱਸਟ ਨੂੰ ਜ਼ਿਲਾ ਕੰਜ਼ਿਊਮਰ ਫੋਰਮ ਵਿੱਚ ਲਗਾਤਾਰ ਹਾਰ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਇੱਕ ਅਕਤੂਬਰ ਦੇ ਜ਼ਿਲਾ ਕੰਜ਼ਿਊਮਰ ਫੋਰਮ ਦੇ ਪ੍ਰੈਜ਼ੀਡੈਂਟ ਕਰਨੈਲ ਸਿੰਘ ਅਤੇ ਮੈਂਬਰ ਜਯੋਤਸਨਾ ਨੇ ਪੰਜ ਕੇਸਾਂ ਵਿੱਚ ਅਲਾਟੀਆਂ ਦੇ ਹੱਕ ਵਿੱਚ ਫੈਸਲਾ ਦਿੱਤਾ ਹੈ। ਇਸ ਵਿੱਚ ਗਾਂਧੀ ਵਿਹਾਰ ਦੇ ਡੀ ਸੀ ਗੁਪਤਾ ਨੂੰ ਪ੍ਰਿੰਸੀਪਲ ਅਮਾਊਂਟ 1,55,149 ਰੁਪਏ, ਮੁਆਵਜ਼ਾ 30 ਹਜ਼ਾਰ ਅਤੇ ਅਦਾਲਤੀ ਖਰਚ ਦੇ ਪੰਜ ਹਜ਼ਾਰ ਅਤੇ ਵਿਆਜ਼ ਰਾਸ਼ੀ ਮਿਲਾ ਕੇ ਕੁੱਲ 3,60,149 ਰੁਪਏ ਦੇਣ ਦਾ ਨਿਰਦੇਸ਼ ਦਿੱਤਾ ਗਿਆ ਹੈ। ਅਜੀਤ ਐਵੇਨਿਊ ਕਪੂਰਥਲਾ ਦੇ ਕੈਪਟਨ ਗੁਰਮੀਤ ਸਿੰਘ ਨੂੰ 11,68,100 ਰੁਪਏ ਅਤੇ ਰਾਜਾ ਗਾਰਡਨ ਦੇ ਸੁਨੀਲ ਭਾਟੀਆ ਨੂੰ 11,68,000 ਰੁਪਏ ਦੇਣ ਦਾ ਹੁਕਮ ਦਿੱਤਾ ਹੋਇਆ ਹੈ। ਬਸਤੀ ਸ਼ੇਖ ਦੇ ਗੋਪਾਲ ਕ੍ਰਿਸ਼ਨ ਨੂੰ 6,26,422 ਦੀ ਪ੍ਰਿੰਸੀਪਲ ਅਮਾਊਂਟ, 30 ਹਜ਼ਾਰ ਰੁਪਏ ਮੁਆਵਜ਼ਾ ਦੇ ਨਾਲ ਹੀ ਪੰਜ ਹਜ਼ਾਰ ਵਕੀਲੀ ਖਰਚ ਅਤੇ ਵਿਆਜ ਸਮੇਤ ਕੁੱਲ 12,61,422 ਰੁਪਏ ਦੇਣ ਅਤੇ ਬਸ਼ੀਰਪੁਰਾ ਦੇ ਹਰਪ੍ਰੀਤ ਸਿੰਘ ਨੂੰ 3,79,257 ਪ੍ਰਿੰਸੀਪਲ ਅਮਾਊਂਟ, 30 ਹਜ਼ਾਰ ਰੁਪਏ ਮੁਆਵਜ਼ਾ, ਪੰਜ ਹਜ਼ਾਰ ਰੁਪਏ ਵਕੀਲ ਖਰਚ ਅਤੇ ਵਿਆਜ ਸਮੇਤ ਕੁੱਲ 76,43,57 ਰੁਪਏ ਦੇਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਆਰਥਿਕ ਤੰਗੀ ਵਿੱਚ ਫਸੇ ਹੋਏ ਟਰੱਸਟ ਉਤੇ ਕਈ ਕੇਸ ਹਾਰਨ ਨਾਲ ਲੱਖਾਂ ਰੁਪਏ ਦਾ ਬੋਝ ਪੈ ਗਿਆ ਹੈ। ਸਹੀ ਸਮੇਂ ਫਲੈਟ ਨਾ ਮਿਲਣ ਕਾਰਨ ਅਲਾਟੀ ਫੋਰਮ ਦਾ ਦਰਵਾਜ਼ਾ ਖੜਕਾ ਰਹੇ ਹਨ। ਜ਼ਿਲਾ ਕੰਜ਼ਿਊਮਰ ਫੋਰਮ ਤੋਂ ਅਲਾਟੀ ਐਸੋਸੀਏਸ਼ਨ 38 ਕੇਸ ਜਿੱਤ ਚੁੱਕੀ ਹੈ। ਅਜੇ 62 ਕੇਸ ਵਿਚਾਰ ਅਧੀਨ ਹਨ। ਸਟੇਟ ਕੰਜ਼ਿਊਮਰ ਫੋਰਮ ਵਿੱਚ ਵੀ ਐਸੋਸੀਏਸ਼ਨ ਦੇ ਹੱਕ ਵਿੱਚ 13 ਕੇਸਾਂ ਦੀ ਸੁਣਵਾਈ ਹੋ ਚੁੱਕੀ ਹੈ।