ਕਰਾਚੀ, 3 ਅਕਤੂਬਰ (ਪੋਸਟ ਬਿਊਰੋ)- ਪਾਕਿਸਤਾਨ ਵਿੱਚ ਘੱਟ ਗਿਣਤੀ ਭਾਈਚਾਰਿਆਂ ਨਾਲ ਸਬੰਧਿਤ ਕੁੜੀਆਂ ਦੇ ਜਬਰੀ ਧਰਮ ਪਰਿਵਰਤਨ ਦੀਆਂ ਘਟਨਾਵਾਂ ਲਗਾਤਾਰ ਜ਼ੋਰ ਫੜੀ ਜਾ ਰਹੀਆਂ ਹਨ।
ਮਿਲੀ ਜਾਣਕਾਰੀ ਅਨੁਸਾਰ ਬੀਤੇ ਦਿਨੀਂ ਸੂਬਾ ਸਿੰਧ ਦੇ ਵੱਖ-ਵੱਖ ਸ਼ਹਿਰਾਂ ਤੋਂ ਸ਼ਮ੍ਹਾ ਮੇਘਵਾਰ, ਅਨੀਤਾ ਕੋਹਲੀ ਅਤੇ ਆਰਤੀ ਠਾਕੁਰ(13) ਨੂੰ ਅਗਵਾ ਕਰਕੇ ਉਨ੍ਹਾਂ ਦਾ ਜਬਰੀ ਧਰਮ ਪਰਿਵਰਤਨ ਕਰਵਾਏ ਜਾਣ ਦੀ ਖਬਰ ਆਈ ਹੈ। ਸ਼ਮ੍ਹਾ ਮੇਘਵਾਰ ਇੱਕ ਬੱਚੇ ਦੀ ਮਾਂ ਹੈ, ਉਸ ਨੂੰ ਅਣਪਛਾਤੇ ਲੋਕਾਂ ਨੇ ਬੱਚੇ ਸਮੇਤ ਅਗਵਾ ਕੀਤਾ ਸੀ, ਪਰ ਇਸ ਦੇ ਕੁਝ ਘੰਟੇ ਬਾਅਦ ਉਥੋਂ ਦੀ ਸਥਾਨਕ ਪੁਲਸ ਨੇ ਪੀੜਤ ਦੇ ਪਤੀ ਨੂੰ ਦੱਸਿਆ ਕਿ ਉਸ ਦਾ ਮਿਲਣਾ ਸੰਭਵ ਨਹੀਂ।
ਇੱਕ ਹੋਰ ਕੇਸ 'ਚ ਸੂਬੇ ਦੇ ਹੈਦਰਾਬਾਦ ਸ਼ਹਿਰ ਤੋਂ ਅਗਵਾ ਕੀਤੀ ਗਈ ਆਰਤੀ ਠਾਕੁਰ ਦੇ ਪਿਤਾ ਵਗੂ ਠਾਕੁਰ ਨੇ ਦੱਸਿਆ ਕਿ ਉਸ ਦੀ ਨਾਬਾਲਗ ਪੁੱਤਰੀ ਨੂੰ ਉਸ ਦੀਆਂ ਅੱਖਾਂ ਸਾਹਮਣੇ ਉਮੇਰ ਅਲੀ ਨਾਂਅ ਦੇ ਮੁਸਲਿਮ ਨੌਜਵਾਨ ਨੇ ਅਗਵਾ ਕੀਤਾ। ਆਰਤੀ ਨੇ ਆਪਣੀ ਇੱਛਾ ਨਾਲ ਇਸਲਾਮ ਕਬੂਲ ਕਰਕੇ ਉਕਤ ਨੌਜਵਾਨ ਨਾਲ ਨਿਕਾਹ ਕਰ ਲਿਆ ਹੈ। ਅਗਵਾਕਾਰਾਂ ਦੇ ਕਬਜ਼ੇ 'ਚੋਂ ਭੱਜ ਕੇ ਆਪਣੇ ਪਿਤਾ ਕੋਲ ਪੁੱਜੀ ਅਨੀਤਾ ਕੋਹਲੀ ਪੁੱਤਰੀ ਨਾਨਾ ਕੋਹਲੀ ਨੂੰ ਅਗਵਾ ਕਰਕੇ ਜਬਰੀ ਧਰਮ ਪਰਿਵਰਤਨ ਕਰਾਉਣ ਵਾਲੇ ਅਬਦੁਲ ਕਾਦਰ, ਬਾਖਲ, ਨੇਕ ਮੁਹੰਮਦ ਤੇ ਸੁਲੇਮਾਨ ਨੇ ਦੋਸ਼ ਲਾਇਆ ਹੈ ਕਿ ਅਨੀਤਾ ਆਪਣੀ ਇੱਛਾ ਨਾਲ ਰਹਿ ਰਹੀ ਸੀ। ਪੀੜਤ ਨੇ ਪੁਲਸ ਨੂੰ ਦੱਸਿਆ ਕਿ ਉਹ ਅਗਵਾਕਾਰ ਉਸ ਦਾ ਜਬਰੀ ਧਰਮ ਪਰਿਵਰਤਨ ਕਰਵਾ ਕੇ ਸਮੂਹਿਕ ਤੌਰ 'ਤੇ ਪਿਛਲੇ ਲਗੱਪਗ ਇਕ ਹਫਤੇ ਤੋਂ ਉਸ ਨਾਲ ਬਲਾਤਕਾਰ ਕਰ ਰਹੇ ਸਨ।
ਇਸ ਬਾਰੇ ਪਾਕਿ ਦੇ ਮਨੁੱਖੀ ਅਧਿਕਾਰ ਸੰਗਠਨ ਦੀ ਕਾਰਕੁਨ ਬੀਬੀ ਮੰਗਲਾ ਸ਼ਰਮਾ ਨੇ ਕਿਹਾ ਕਿ ਬਹੁਤੇ ਕੇਸਾਂ 'ਚ ਧਰਮ ਪਰਿਵਰਤਨ ਨੂੰ ਸਵਾਬ ਦਾ ਕੰਮ ਮੰਨ ਕੇ ਅਦਾਲਤਾਂ ਤੇ ਪੁਲਸ ਵਲੋੋਂ ਮੁਲਜ਼ਮ ਵਿਰੁੱਧ ਕੋਈ ਕਾਰਵਾਈ ਨਹੀਂ ਕੀਤੀ ਜਾਂਦੀ। 90 ਫੀਸਦੀ ਕੇਸਾਂ 'ਚ ਧਰਮ ਪਰਿਵਾਰਤਨ ਤੇ ਨਿਕਾਹ ਉਪਰੰਤ 4-5 ਮਹੀਨਿਆਂ ਬਾਅਦ ਲੜਕੀ ਨੂੰ ਛੱਡ ਦਿੱਤਾ ਜਾਂਦਾ ਹੈ ਤੇ ਫਿਰ ਉਨ੍ਹਾਂ ਦਾ ਆਪਣਾ ਪਰਵਾਰ ਵੀ ਬਦਨਾਮੀ ਦੇ ਡਰੋਂ ਉਨ੍ਹਾਂ ਨੂੰ ਸਵੀਕਾਰ ਨਹੀਂ ਕਰਦਾ। ਉਸ ਵੇਲੇ ਜਾਂ ਤਾਂ ਅਜਿਹੀਆਂ ਲੜਕੀਆਂ ਨੂੰ ਮਾਰ ਦਿੱਤਾ ਜਾਂਦਾ ਹੈ ਜਾਂ ਉਹ ਮਜਬੂਰਨ ਵੇਸ਼ਵਾ-ਘਰ 'ਚ ਪਹੁੰਚ ਜਾਂਦੀਆਂ ਹਨ।