ਓਟਵਾ, 3 ਅਕਤੂਬਰ (ਪੋਸਟ ਬਿਊਰੋ) : ਕੱਲ੍ਹ ਰਾਤ ਹੋਈ ਫਰੈਂਚ ਭਾਸ਼ਾ ਦੀ ਬਹਿਸ ਤੋਂ ਬਾਅਦ ਫੈਡਰਲ ਪਾਰਟੀ ਆਗੂ ਚੋਣਾਂ ਦੀ ਅਗਲੀ ਤਿਆਰੀ ਲਈ ਵੱਖ ਹੋ ਗਏ।
ਸਾਰੇ ਫੈਡਰਲ ਆਗੂਆਂ ਨੇ ਚੋਣਾਂ ਲਈ ਆਪਣੇ ਅਗਲੇ ਮੋਰਚੇ ਸਾਂਭਣ ਲਈ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ। ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਆਪਣੀ ਚੋਣ ਮੁਹਿੰਮ ਨੂੰ ਐਟਲਾਂਟਿਕ ਕੈਨੇਡਾ ਲੈ ਕੇ ਜਾ ਰਹੇ ਹਨ ਤੇ ਇਸ ਦੌਰਾਨ ਉਹ ਨਿਊ ਬਰੰਜ਼ਵਿੱਕ ਤੇ ਨੋਵਾ ਸਕੋਸ਼ੀਆ ਵੀ ਰੁਕਣਗੇ। ਐਨਡੀਪੀ ਆਗੂ ਜਗਮੀਤ ਸਿੰਘ ਟੋਰਾਂਟੋ ਵਿੱਚ ਹਨ। ਉਹ ਉਨ੍ਹਾਂ ਇਲਾਕਿਆਂ ਉੱਤੇ ਨਜ਼ਰ ਲਾਈ ਬੈਠੇ ਹਨ ਜਿਨ੍ਹਾਂ ਨੂੰ ਉਹ ਆਸਾਨੀ ਨਾਲ ਲਿਬਰਲਾਂ ਤੋਂ ਖੋਹ ਸਕਦੇ ਹਨ। ਇਸ ਤੋਂ ਪਹਿਲਾਂ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਰੀਝ ਨਾਲ ਐਨਡੀਪੀ ਆਗੂ ਵੱਲੋਂ ਚੋਣ ਪ੍ਰਚਾਰ ਕੀਤਾ ਗਿਆ।
ਗ੍ਰੀਨ ਪਾਰਟੀ ਦੀ ਆਗੂ ਐਲਿਜ਼ਾਬੈੱਥ ਮੇਅ ਤੇ ਪੀਪਲਜ਼ ਪਾਰਟੀ ਦੇ ਆਗੂ ਮੈਕਸਿਮ ਬਰਨੀਅਰ ਵੀ ਆਪੋ ਆਪਣੇ ਇਲਾਕਿਆਂ ਵਿੱਚ ਹੀ ਚੋਣ ਪਿੜ ਮਘਾ ਰਹੇ ਹਨ। ਮੇਅ ਵੈਨਕੂਵਰ ਆਈਲੈਂਡ ਵਿੱਚ ਚੋਣ ਪ੍ਰਚਾਰ ਕਰ ਰਹੀ ਹੈ ਤੇ ਬਰਨੀਅਰ ਇਸ ਸਮੇਂ ਕਿਊਬਿਕ ਦੇ ਬਿਊਸ ਇਲਾਕੇ ਵਿੱਚ ਹਨ। ਅਗਲੇ ਹਫਤੇ ਇਨ੍ਹਾਂ ਆਗੂਆਂ ਦੀਆਂ ਦੋ ਹੋਰ ਬਹਿਸਾਂ ਹੋਣਗੀਆਂ। ਇਨ੍ਹਾਂ ਬਹਿਸਾਂ ਦਾ ਪ੍ਰਬੰਧ ਨਿਊ ਫੈਡਰਲ ਡਿਬੇਟਜ਼ ਕਮਿਸ਼ਨ ਵੱਲੋਂ ਕੀਤਾ ਜਾਵੇਗਾ।