ਆਲੀਆ ਭੱਟ ਨੇ ਆਪਣੀ ਸਫਲਤਾ ਦਾ ਸਿਹਰਾ ਹਮੇਸ਼ਾ ਆਪਣੀ ਲਗਨ ਤੇ ਮਿਹਨਤ ਨੂੰ ਦਿੱਤਾ ਹੈ। ਜਦੋਂ ਉਸ ਤੋਂ ਪੁੱਛਿਆ ਗਿਆ ਕਿ ਘੱਟ ਸਮੇਂ ਵਿੱਚ ਮਾਇਆ ਨਗਰੀ ਵਿੱਚ ਅਪਾਰ ਸਫਲਤਾ ਹਾਸਲ ਕਰਨ ਅਤੇ ਹਰ ਫਿਲਮ ਵਿੱਚ ਆਪਣੀ ਐਕਟਿੰਗ ਦੀ ਤਾਰੀਫ ਹੋਣ 'ਤੇ ਉਸ ਨੂੰ ਕਿਹੋ ਜਿਹਾ ਮਹਿਸੂਸ ਹੁੰਦਾ ਹੈ ਤਾਂ ਵੀ ਉਸ ਦਾ ਕੁਝ ਇਹੀ ਜਵਾਬ ਸੀ। ਉਸ ਦਾ ਕਹਿਣਾ ਸੀ, ‘‘ਇਹੀ ਕਹਾਂਗੀ ਕਿ ਮੈਂ ਸਿਰਫ ਆਪਣਾ ਕੰਮ ਕਰਦੀ ਹਾਂ, ਮਿਹਨਤ ਕਰਦੀ ਹਾਂ। ਮੇਰੇ ਹੱਥ ਵਿੱਚ ਸਿਰਫ ਇੰਨਾ ਹੈ। ਜੇ ਕਲਾਕਾਰਾਂ, ਸਮੀਖਿਅਕਾਂ ਅਤੇ ਦਰਸ਼ਕਾਂ ਨੂੰ ਮੇਰਾ ਕੰਮ ਪਸੰਦ ਆਉਂਦਾ ਹੈ ਤਾਂ ਇਸ ਨੂੰ ਆਪਣੀ ਖੁਸ਼ ਕਿਸਮਤੀ ਕਹਾਂਗੀ। ਉਨ੍ਹਾਂ ਦੀ ਇਹ ਚਾਹਤ ਤੇ ਮੇਰੇ ਪ੍ਰਤੀ ਉਨ੍ਹਾਂ ਦਾ ਪਿਆਰ ਮੇਰੇ ਲਈ ਐਵਾਰਡ ਤੋਂ ਘੱਟ ਨਹੀਂ ਹੈ।”
ਫਿਰ ਵੀ ਉਸ ਦੀ ਸਫਲਤਾ ਦਾ ਰਾਜ਼ ਜਾਨਣ ਬਾਰੇ ਅਕਸਰ ਸਵਾਲ ਉਠਦੇ ਰਹਿੰਦੇ ਹਨ ਅਤੇ ਹਾਲ ਹੀ 'ਚ ਉਸ ਤੋਂ ਪੁੱਛਿਆ ਗਿਆ ਕਿ ਉਸ ਦੀ ਸਫਲਤਾ ਦਾ ਮੰਤਰ ਕੀ ਹੈ ਤਾਂ ਆਲੀਆ ਨੇ ਕਿਹਾ, ‘‘ਫਿਲਮਾਂ ਮੇਰੇ ਲਈ ਕਿਸੇ ਤਰ੍ਹਾਂ ਦੀ ਰੇਸ ਨਹੀਂ, ਜਿਸ 'ਚ ਮੈਂ ਹਾਰਨਾ ਜਾਂ ਜਿੱਤਣਾ ਹੈ। ਇਹ ਮੇਰੇ ਲਈ ਅਜਿਹੀ ਜਗ੍ਹਾ ਹੈ, ਜਿੱਥੇ ਮੈਂ ਆਪਣੀ ਕ੍ਰਿਏਟੀਵਿਟੀ ਦਿਖਾ ਸਕਾਂ। ਕੋਈ ਫਿਲਮ ਕਰਨ ਤੋਂ ਪਹਿਲਾਂ ਮੈਂ ਸੋਚਦੀ ਹਾਂ ਕਿ ਆਖਿਰ ਕਿਵੇਂ ਮੈਂ ਇਸ ਵਿੱਚ ਬਿਹਤਰ ਕਰਾਂ।” ਉਸ ਨੇ ਕਿਹਾ, ‘‘ਮੈਨੂੰ ਹੈਲਦੀ ਕੰਪੀਟੀਸ਼ਨ ਪਸੰਦ ਹੈ, ਪਰ ਮੈਂ ਅਜਿਹੀ ਨਹੀਂ ਹਾਂ ਕਿ ਸਿਰਫ ਰੇਸ ਵਿੱਚ ਭੱਜ ਰਹੀ ਹਾਂ ਅਤੇ ਆਲੇ ਦੁਆਲੇ ਕੁਝ ਨਹੀਂ ਦੇਖ ਰਹੀ। ਸਮੇਂ ਦੀ ਲੋੜ ਦੇ ਹਿਸਾਬ ਨਾਲ ਮੈਂ ਆਪਣੇ ਕੰਮ 'ਚ ਤਬਦੀਲੀ ਕਰਦੀ ਹਾਂ ਕਿ ਜੇ ਤੁਸੀਂ ਚੰਗਾ ਕਰੋਗੇ ਤਾਂ ਲੋਕ ਤੁਹਾਨੂੰ ਪਸੰਦ ਕਰਨਗੇ, ਜੇ ਖਰਾਬ ਕਰਦੇ ਹੋ ਤਾਂ ਤੁਹਾਡਾ ਪੱਧਰ ਡਿੱਗ ਜਾਂਦਾ ਹੈ।” ਉਸ ਨੇ ਕਿਹਾ, ‘‘ਹਾਲ ਹੀ 'ਚ ਮੈਂ ਇੱਕ ਕਿਤਾਬ ਪੜ੍ਹ ਰਹੀ ਸੀ, ਜਿਸ ਵਿੱਚ ਲਿਖਿਆ ਸੀ ਕਿ ਤੁਸੀਂ ਲਾਈਫ 'ਚ ਖੁਦ ਲਈ ਕੁਝ ਚੀਜ਼ਾਂ ਨਿਰਧਾਰਤ ਕਰਦੇ ਹੋ, ਪਰ ਇਹ ਨਹੀਂ ਕਿ ਜਦੋਂ ਤੁਹਾਨੂੰ ਆਪਣਾ ਟੀਚਾ ਮਿਲ ਜਾੇ ਤਾਂ ਤੁਸੀਂ ਸ਼ਾਂਤੀ ਨਾਲ ਬੈਠ ਗਏ ਅਤੇ ਬੱਸ ਜ਼ਿੰਦਗੀ ਬਿਤਾ ਰਹੇ ਹੋ। ਤੁਹਾਨੂੰ ਹਮੇਸ਼ਾ ਆਪਣੀ ਜ਼ਿੰਦਗੀ ਬਿਹਤਰ ਕਰਨ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ।”