ਓਟਵਾ, 2 ਅਕਤੂਬਰ (ਪੋਸਟ ਬਿਊਰੋ) : ਅੱਜ ਚਾਰ ਫੈਡਰਲ ਆਗੂ ਮਾਂਟਰੀਅਲ ਵਿੱਚ ਫਰੈਂਚ ਭਾਸ਼ਾ ਵਿੱਚ ਹੋਣ ਵਾਲੀ ਪਹਿਲੀ ਬਹਿਸ ਵਿੱਚ ਹਿੱਸਾ ਲੈਣਗੇ।
ਕੰਜ਼ਰਵੇਟਿਵ ਐਂਡਰਿਊ ਸ਼ੀਅਰ, ਨਿਊ ਡੈਮੋਕ੍ਰੈਟ ਜਗਮੀਤ ਸਿੰਘ ਤੇ ਬਲਾਕ ਕਿਊਬਿਕੁਆ ਦੇ ਯਵੇਸ ਫਰੈਂਕੌਇਸ ਬਲੈਂਚੈਟ ਅੱਜ ਲਿਬਰਲ ਆਗੂ ਜਸਟਿਨ ਟਰੂਡੋ ਨਾਲ ਰਾਤੀਂ 8:00 ਵਜੇ ਬਹਿਸ ਵਿੱਚ ਹਿੱਸਾ ਲੈਣਗੇ। ਇਹ ਬਹਿਸ ਟੀਵੀਏ ਟੈਲੀਵਿਜ਼ਨ ਨੈੱਟਵਰਕ ਤੇ ਮਾਂਟਰੀਅਲ ਦੇ ਅਖਬਾਰ ਲੀ ਜਰਨਲ ਵੱਲੋਂ ਕਰਵਾਈ ਜਾ ਰਹੀ ਹੈ।
ਇਸ ਤੋਂ ਭਾਵ ਇਹ ਹੈ ਕਿ ਸਾਰੇ ਆਗੂ ਹੀ ਇਸ ਬਹਿਸ ਲਈ ਅੱਜ ਕਾਫੀ ਤਿਆਰੀ ਕਰਨ ਵਿੱਚ ਹੀ ਲੰਘਾਉਣਗੇ। ਹਾਲਾਂਕਿ ਲਿਬਰਲਾਂ ਵੱਲੋਂ ਟੋਰਾਂਟੋ ਵਿੱਚ ਅੱਜ ਕੈਬਨਿਟ ਮੰਤਰੀ ਨਵਦੀਪ ਬੈਂਸ ਨੂੰ ਲੈ ਕੇ ਕੈਂਪੇਨ ਸਬੰਧੀ ਐਲਾਨ ਕੀਤਾ ਜਾਣਾ ਹੈ ਤੇ ਟੋਰੀਜ਼ ਵੀ ਮਾਂਟਰੀਅਲ ਵਿੱਚ ਸ਼ੀਅਰ ਦੇ ਕਿਊਬਿਕ ਉਮੀਦਵਾਰ ਐਲੇਨ ਰੇਅਜ਼ ਦੇ ਪ੍ਰਚਾਰ ਵਿੱਚ ਮਦਦ ਦੀ ਯੋਜਨਾ ਬਣਾ ਰਹੇ ਹਨ। ਟਰੂਡੋ ਵੱਲੋਂ ਫੋਟੋ ਓਪ ਲਈ ਬਾਕਸਿੰਗ ਜਿੰਮ ਦਾ ਦੌਰਾ ਕੀਤੇ ਜਾਣ ਦੀ ਯੋਜਨਾ ਬਣਾਈ ਜਾ ਰਹੀ ਹੈ। ਜਗਮੀਤ ਸਿੰਘ ਮਾਰਕਿਟ ਦਾ ਦੌਰਾ ਕਰਕੇ ਆਪਣੀ ਟੀਮ ਲਈ ਸਨੈਕਸ ਆਦਿ ਖਰੀਦਣ ਦਾ ਮਨ ਬਣਾ ਰਹੇ ਹਨ।
ਪ੍ਰਬੰਧਕਾਂ ਵੱਲੋਂ ਗ੍ਰੀਨ ਪਾਰਟੀ ਦੀ ਆਗੂ ਐਲਿਜ਼ਾਬੈੱਥ ਮੇਅ ਨੂੰ ਇਸ ਬਹਿਸ ਲਈ ਸੱਦਾ ਨਹੀਂ ਦਿੱਤਾ ਗਿਆ ਤੇ ਨਾ ਹੀ ਪੀਪਲਜ਼ ਪਾਰਟੀ ਦੇ ਆਗੂ ਮੈਕਸਿਮ ਬਰਨੀਅਰ ਨੂੰ ਹੀ ਸੱਦਾ ਦਿੱਤਾ ਗਿਆ ਹੈ। ਇਹ ਦੋਵੇਂ ਆਗੂ ਆਪੋ ਆਪਣੇ ਹਲਕਿਆਂ ਜਾਂ ਉੱਥੋਂ ਨੇੜਲੇ ਹਲਕਿਆਂ ਵਿੱਚ ਹੀ ਕੈਂਪੇਨਿੰਗ ਕਰ ਰਹੇ ਹਨ। ਅੱਜ ਵਾਲੀ ਬਹਿਸ ਇਸ ਲਈ ਵੀ ਖਾਸ ਹੈ ਕਿਉਂਕਿ ਇਹ ਤਿੰਨ ਬਹਿਸਾਂ ਵਿੱਚੋਂ ਪਹਿਲੀ ਹੈ ਜਿਸ ਵਿੱਚ ਟਰੂਡੋ ਹਿੱਸਾ ਲੈਣਗੇ। ਦੋ ਹੋਰ ਬਹਿਸ ਅਗਲੇ ਹਫਤੇ ਨਿਊ ਫੈਡਰਲ ਡਿਬੇਟ ਕਮਿਸ਼ਨ, ਜਿਸ ਦੀ ਅਗਵਾਈ ਸਾਬਕਾ ਗਵਰਨਰ ਜਨਰਲ ਡੇਵਿਡ ਜੌਹਨਸਟਨ ਕਰਦੇ ਹਨ, ਵੱਲੋਂ ਆਯੋਜਿਤ ਕੀਤੀਆਂ ਗਈਆਂ ਹਨ।