ਤਨਿਸ਼ਠਾ ਚੈਟਰਜੀ ਫਿਲਮ ‘ਝਲਕੀ’ ਵਿੱਚ ਅਜਿਹੀ ਜਰਨਲਿਸਟ ਬਣੀ ਹੈ, ਜੋ ਇੱਕ ਲੜਕੀ ਦੀ ਮਦਦ ਕਰ ਕੇ ਉਸ ਦੇ ਭਰਾ ਨੂੰ ਬਾਲ ਮਜ਼ਦੂਰੀ ਤੋਂ ਛੁਟਕਾਰਾ ਦਿਵਾਉਂਦੀ ਹੈ। ਜਲਦੀ ਹੀ ਤਨਿਸ਼ਠਾ ਲੇਖਨ-ਨਿਰਦੇਸ਼ਨ ਦੇ ਖੇਤਰ ਵਿੱਚ ਵੀ ਪੈਰ ਰੱਖੇਗੀ। ਪੇਸ਼ ਹਨ ਇਸੇ ਸਿਲਸਿਲੇ ਵਿੱਚ ਉਸ ਨਾਲ ਹੋਈ ਗੱਲਬਾਤ ਦੇ ਕੁਝ ਅੰਸ਼ :
* ਇਹ ਫਿਲਮ ਕਰ ਕੇ ਬਾਲ ਮਜ਼ਦੂਰੀ ਦੇ ਬਾਰੇ ਤੁਸੀਂ ਕੀ ਜਾਣਿਆ ਜੋ ਸ਼ਾਕਿੰਗ ਲੱਗਾ?
- ਕਾਫੀ ਕੁਝ ਜਾਣਿਆ ਸਮਝਿਆ। ਇਸ ਦੇ ਇਲਾਵਾ ਮੈਂ ਇਨ੍ਹਾਂ ਸਭ ਚੀਜ਼ਾਂ ਬਾਰੇ ਕੁਝ ਸਾਲਾਂ ਤੋਂ ਕੁਝ ਕੰਮ ਕਰ ਰਹੀ ਹਾਂ। ਸੱਤ ਸਾਲ ਤੋਂ ਦੋ ਬੱਚਿਆਂ ਦੀ ਪੜ੍ਹਾਈ ਲਈ ਸਪਾਂਸਰ ਕਰਦੀ ਸੀ। ਉਹ ਕਾਲਜ ਕਰਨ ਦੇ ਬਾਅਦ ਨੌਕਰੀ ਕਰਨ ਲੱਗ ਗਏ। ਮੇਰਾ ਮੰਨਣਾ ਹੈ ਕਿ ਦੇਸ਼ ਦੇ ਹਰ ਬੱਚੇ ਨੂੰ ਫ੍ਰੀ ਐਜੂਕੇਸ਼ਨ, ਹੈਲਥ ਅਤੇ ਗੁਡ ਫੂਡ ਲਈ ਇਨਵੈਸਟਮੈਂਟ ਸਾਡੇ ਦੇਸ਼ ਦੇ ਲਈ ਸਭ ਤੋਂ ਅਹਿਮ ਇਨਵੈਸਟਮੈਂਟ ਹੈ।
* ਬਾਲੀਵੁੱਡ ਅਤੇ ਟੀ ਵੀ ਵਿੱਚ ਬਾਲ ਕਲਾਕਾਰ ਕੰਮ ਕਰ ਰਹੇ ਹਨ। ਕੀ ਉਨ੍ਹਾਂ ਦੇ ਜੀਵਨ 'ਤੇ ਅਸਰ ਨਹੀਂ ਪੈ ਰਿਹਾ?
-ਬਿਲਕੁਲ, ਅਸਰ ਪੈਂਦਾ ਹੈ। ਇਹ ਮੇਰਾ ਪ੍ਰਸਨਲ ਓਪੀਨੀਅਨ ਹੈ। ਫਿਲਮਾਂ ਵਿੱਚ ਬੱਚੇ ਕੰਮ ਕਰਨ ਦੇ ਬਾਅਦ ਸਕੂਲ ਵੀ ਚਲੇ ਜਾਂਦੇ ਹਨ, ਪਰ ਟੀ ਵੀ ਵਿੱਚ ਕੰਮ ਕਰਦੇ ਹੋਏ ਏਦਾਂ ਨਹੀਂ ਹੁੰਦਾ। ਮੈਂ ਬਚਪਨ ਵਿੱਚ ਇਵੇਂ ਹੀ ਵਿਚਾਲੇ ਥੀਏਟਰ, ਮਿਊਜ਼ਿਕ ਦੇ ਨਾਲ ਪੜ੍ਹਾਈ ਕੀਤੀ। ਇਹ ਇਨਕਰੇਜ ਕਰਦੀ ਹੈ, ਪਰ ਤੁਸੀਂ ਬਚਪਨ ਤੋਂ ਨੌਂ ਤੋਂ ਪੰਜ ਵਜੇ ਤੱਕ ਇੱਕ ਦੇ ਬਾਅਦ ਇੱਕ ਸੀਰੀਅਲ ਕਰਦੇ ਹੋ, ਤਦ ਇਸ ਗੱਲ ਨਾਲ ਮੈਂ ਐਗਰੀ ਨਹੀਂ ਹਾਂ।
* ਕੀ ਮਾਪਿਆਂ 'ਤੇ ਵੀ ਕੁਝ ਡਿਪੈਂਡ ਕਰਦਾ ਹੈ?
- ਮੈਂ ਬਹੁਤ ਵਾਰ ਦੇਖਿਆ ਹੈ ਕਿ ਚਾਈਲਡ ਆਰਟਿਸਟ ਨੂੰ ਵੱਡੇ ਹੋ ਕੇ ਉਹ ਫੇਮ ਨਹੀਂ ਮਿਲਦੀ। ਬਚਪਨ ਵਿੱਚ ਸਟਾਰ ਤਾਂ ਬਣ ਜਾਂਦੇ ਹਨ, ਪਰ ਵੱਡੇ ਹੋ ਕੇ ਉਹ ਉਹੋ ਜਿਹੀ ਜ਼ਿੰਦਗੀ ਜੀਅ ਨਹੀਂ ਪਾਉਂਦੇ। ‘ਹੈਰੀਪਾਟਰ’ ਦੀ ਸਟਾਰ ਨੇ ਵਿੱਚ-ਵਿੱਚ ਆਪਣੀ ਪੜ੍ਹਾਈ ਲਗਾਤਾਰ ਕੀਤੀ ਹੈ। ਅੱਜ ਕੱਲ੍ਹ ਉਹ ਵੱਡੀ ਹੋ ਗਈ ਹੈ। ਸਟਾਰ ਹੋਣ ਦੇ ਬਾਅਦ ਵੀ ਉਹ ਦੋ ਸਾਲ ਦਾ ਪੂਰੀ ਤਰ੍ਹਾਂ ਬ੍ਰੇਕ ਲੈ ਕੇ ਯੂਨੀਵਰਸਿਟੀ ਵਿੱਚ ਮਾਸਟਰ ਡਿਗਰੀ ਲੈ ਰਹੀ ਹੈ। ਇਹ ਗੱਲਾਂ ਮਾਪਿਆਂ 'ਤੇ ਵੀ ਡਿਪੈਂਡ ਕਰਦੀਆਂ ਹਨ ਕਿ ਬੱਚਿਆਂ ਨੂੰ ਸਹੀ ਗਾਈਡਲਾਈਨ ਦੇਣ।
* ਤੁਸੀਂ ਕਾਫੀ ਬੋਲਡ ਰੋਲ ਕਰ ਚੁੱਕੇ ਹੋ। ਆਖਰ ਕਿਵੇਂ ਇੰਨੇ ਗਲੈਮਰਜ਼ ਰੋਲ ਕਰ ਲੈਂਦੇ ਹੋ?
- ਇਹ ਐਕਟਰ ਦੀ ਟਰੇਨਿੰਗ ਹੁੰਦੀ ਹੈ। ਅਸੀਂ ਐਕਟਰ ਹਾਂ, ਸਾਡਾ ਕੰਮ ਇਹੀ ਹੈ ਕਿ ਕਿਸੇ ਨੂੰ ਦੇਖ ਕੇ ਪ੍ਰੇਰਿਤ ਹੋਈਏ। ਜਦ ਮੈਂ ਐੱਨ ਐੱਸ ਡੀ ਵਿੱਚ ਸੀ, ਤਦ ਨਸੀਰ ਸਰ ਦੇ ਨਾਲ ਇੱਕ ਵਰਕਸ਼ਾਪ ਕੀਤਾ ਸੀ। ਉਨ੍ਹਾਂ ਨੇ ਦੱਸਿਆ ਸੀ ਕਿ ਕਿਸੇ ਇਨਸਾਨ ਅਤੇ ਸਟੋਰੀ ਨੂੰ ਜੱਜ ਨਹੀਂ ਕਰਨਾ ਚਾਹੀਦਾ।
* ਤੁਸੀਂ ਕਾਫੀ ਘੱਟ ਫਿਲਮਾਂ ਕਰ ਰਹੇ ਹੋ। ਅਜਿਹਾ ਕਿਉਂ?
- 2017 ਵਿੱਚ ਮੇਰੀਆਂ ਪੰਜ ਫਿਲਮਾਂ ਰਿਲੀਜ਼ ਹੋਈਆਂ ਸਨ। 2018 ਤੋਂ ਆਪਣੀ ਫਿਲਮ ‘ਰੋਮ ਰੋਮ’ ਬਣਾ ਰਹੀ ਹਾਂ, ਇਸ ਲਈ ਕੋਈ ਫਿਲਮ ਨਹੀਂ ਕੀਤੀ। ਇਸ ਨੂੰ ਖੁਦ ਲਿਖਿਆ ਤੇ ਡਾਇਰੈਕਟ ਕਰ ਰਹੀ ਹਾਂ। ਇਹ ਅਗਲੇ ਸਾਲ ਰਿਲੀਜ਼ ਹੋਵੇਗੀ। ਇਸ ਦਾ ਆਲਮੋਸਟ ਕੰਮ ਹੋ ਚੁੱਕਾ ਹੈ। ਇਸ ਵਿਚ ਮੇਨ ਕਲਾਕਾਰਾਂ ਵਿੱਚ ਨਵਾਜ਼ੂਦੀਨ ਸਿੱਦੀਕੀ ਅਤੇ ਮੈਂ ਹਾਂ।
* ਬਾਲ ਮਜ਼ਦੂਰੀ ਨੂੰ ਰੋਕਣ ਲਈ ਕੀ ਨਿਯਮ ਹੋਣਾ ਚਾਹੀਦੈ?
- ਸਰਕਾਰ ਵੱਲੋਂ ਸਖਤ ਰੂਲ ਹੋਣਾ ਚਾਹੀਦਾ ਹੈ। ਕਦੇ ਕਦੇ ਮਾਪੇ ਵੀ ਇੰਨੇ ਐਜੂਕੇਟਿਡ ਨਹੀਂ ਹੁੰਦੇ ਕਿ ਉਹ ਇਸ ਵਿਜ਼ਨ ਨੂੰ ਦੇਖ ਸਕਣ। ਮੈਨੂੰ ਲੱਗਦਾ ਹੈ ਕਿ ਆਪਣੇ ਬੱਚਿਆਂ ਨੂੰ ਐਕਸਪੋਜ਼ਰ ਜ਼ਰੂਰ ਦੇਣ, ਪਰ ਉਸ ਨੂੰ ਕੰਟੀਨਿਊ ਨਹੀਂ ਬਣਾਉਣਾ ਚਾਹੀਦਾ।